|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 117 Hüküm no: 97 Orijinal metin no: [61-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Agop v. Karabet adlı Ermeni’nin bahçesini Abdullah Bey b. Rıdvan Paşa’ya sattığı
Mahmiye-i İstanbul mahallâtından Sulumanastır’da sâkin Agop v. Karabet nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’l-kitâb fahrü’l-akrân Abdullah Bey b. Rıdvan Paşa mahzarında bi’t-tav‘i’s-sâf ikrâr ve takrîr-i kelâm edip Havâss-ı aliyyeye tâbi‘ Hasköy mahallâtından Sütlüce mahallesinde vâki‘ silk-i mülkümde münselik bir tarafı es-Seyyid Emrullah Efendi bahçesi ve iki tarafı mezbûr bahçesi ve bir tarafı tarîk-i âm ile mahdûd ve mümtâz olan mülk bahçemi mezbûr Abdullah Bey’e nakd-i râyic fi’l-vakt dört bin yedi yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan bahçe merkūm Abdullah Bey’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun minvâl-i muharrer üzre sudûr ve zuhûr eden ikrâr ve i‘tirâfını el-mukarru lehü’l-mezbûr Abdullah Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Şa‘bâni’l-mu‘azzam li sene hamsün ve erba‘în ve elf.
Şuhûdü’l-hâl: Süleyman Efendi b. Mirza el-İmâm, Mehmed Bey b. Abdullah, Mehmed Efendi eş-şehîr bi-Keysî, Ahmed Beşe b. Abdullah er-Râcil
|