|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 118 Hüküm no: 98 Orijinal metin no: [62-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Emine bt. Lütfullah ve Güllü? bt. Mustafa’nın evlerini Mehmed Bey b. Mustafa’ya sattıkları
Havâss-ı aliyye kazâsına tâbi‘ Hasköy mahallâtından Keçeci mahallesi sâkinlerinden Emine bt. Lütfullah ve Güllü? bt. Mustafa nâm hâtunlar meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Bey b. Mustafa nâm serbölük mahzarında ikrâr ve takrîr-i kelâm edip karye-i mezkûrede vâki‘ bir tarafı Mustafa b. Abdullah mülkü ve bir tarafı Veli b. Abdullah mülkü ve bir tarafı Mehmed Bey es-serrâcü’s-sultânî mülkü ve bir tarafı tarîk-i âm ile mahdûd ve mümtâz bir bâb fevkānî ve bir bâb tahtânî ve bir kenîfi müştemil olan mülk menzilimizi mezbûr Mehmed Bey’e dört bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledik ol dahi vech-i mübeyyen üzre iştirâ ve kabz ve tesellüm eyledi dediklerinde mukırrân-ı merkūmânların ikrâr-ı meşrûhalarını el-mukarru lehü’l-mezbûr Mehmed Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Şa‘bâni’l-mu‘azzam li sene hamsîn ve erba‘în ve elf.
Şuhûdü’l-hâl: Mustafa Efendi b. Ramazan, Mahmud Çelebi b. Mehmed es-Serrâc, Mehmed Bey Çalık, Mustafa Halîfe b. Surûrî, Mehmed Beşe b. Mustafa, Ahmed b. İlyas, Ali b. Abdullah, Bayram, Mahmud kethüdâ-i peremeci
|