|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 118 Hüküm no: 99 Orijinal metin no: [62-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dimo v. İstiko’nun Nevaku v. Kipro’ya borcu bulunduğunu ikrâr ettiği
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin kasab tâ’ifesinden Nevaku v. Kipro nâm zimmî Dimo v. İstiko nâm zimmîyi meclis-i şer‘-i hatîr-i lâzımü’t-tevkīrde ihzâr ve mahzarında üzerine takrîr-i da‘vâ edip bundan akdem mezbûr Dimo’ya cihet-i karz-ı şer‘îden beş bin yedi yüz akçe vermişdim hâlen ikrâr dahi etmişdir vermede te‘allül eder suâl olunup takrîri tahrîr olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan cevâbına mutâbık beyyine taleb olundukda udûl-i müslimînden olup Mahmiye-i İstanbul’da Nişâncı mahallesinde sâkin Mustafa b. İsa ve habbâz tâ’ifesinden Miho v. İsterpo nâm kimesneler meclis-i şer‘a hâzırân olup gıbbe’l-istişhâd fi’l-hakīka bizim huzûrumuzda merkūm Dimo mezbûr Nevaku’ya karz-ı şer‘îden [63] beş bin yedi yüz akçe deynim vardır dedi biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyet-i şerâ[’i]ti’l-kabûl şehâdetleri hayyiz-i kabûlde vâkı‘a olmağın mâ hüve’l-vâki‘ bi’t-taleb ketb [olundu.] Tahrîren fi’l-yevmi’t-tâsi‘ min Ramazâni’l-mübârek sene 1045.
Şuhûdü’l-hâl: Mehmed b. Bilal, Ali Beşe b. Mehmed, Mehmed b. Abdullah, Ali b. Abdullah, Ali b. Abdullah ve gayruhüm
|