|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 119 Hüküm no: 100 Orijinal metin no: [63-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Gülbeği bt. Abdullah’ın mehr-i müecceli ile muhtelif eşyasını zevci Mehmed Beşe’ye hibe ettiği
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkine Gülbeği bt. Abdullah nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb zevci Mehmed Beşe b. Abdullah nâm mahzarında bi’t-tav‘i’s-sâf ikrâr ve takrîr-i kelâm edip silk-i mülkünde münselik olan üç aded yastık ve bir yorgan ve iki aded beledî döşek ve iki aded sahan ve bir sini ve bir tencere ve bir demir sini ve bir köhne halı yan keçesi ve bir köhne minder ve bir demirli sandık ve zevci mezbûr Mehmed Beşe zimmetinde olan mehr-i müecceli iki bin akçe hakkını mezbûr Mehmed Beşe’ye hibe-i sahîha-i şer‘iyye ile hibe ve temlîk ve teslîm edip ol dahi vech-i muharrer üzre [meclis-i] hibede meblağ-ı mezbûru ve eşyâ-i mezkûreyi kabûl ve ittihâb ve kabz ve tesellüm ve temellük eyledi ba‘de’l-yevm meblağ-ı mezbûr ve eşyâ-i mezkûre merkūm Mehmed Beşe’nin mülk-i mevhûbesidir keyfemâ yeşâ ve yehtâr mutasarrıf olsun dedikde mukırra-i merkūmenin ikrâr-ı meşrûhasını el-mukarru lehü’l-mezbûr Mehmed Beşe dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek sene hamsîn ve erba‘în ve elf.
Şuhûdü’l-hâl: ( )
|