|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 119 Hüküm no: 101 Orijinal metin no: [63-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Gülbeği bt. Abdullah’ın muhtelif eşyasını Aynî Hâtun’a hibe ettiği
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkine Gülbeği bt. Abdullah nâm hâtun meclis-i şer‘-i hatîr-i lâzımü’t-tevkīrde işbu râfi‘atü’l-kitâb Aynî bt. ( ) nâm hâtun mahzarında bi’t-tav‘i’s-sâf ikrâr ve takrîr-i kelâm edip silk-i mülkünde münselik olan bir döşek ve bir yorgan ve bir minder-i köhne ve bir demirli sandık mezbûre Aynî Hâtun’a hibe-i sahîha-i şer‘î ile hibe [ve] temlîk ve teslîm edip ol dahi vech-i muharrer üzre meclis-i hibede eşyâ-i mezkûreyi kabûl ve ittihâb ve kabz ve tesellüm ve temellük eyledi ba‘de’l-yevm eşyâ-i mezkûre merkūme Aynî’nin mülk-i mevhûbudur [64] keyfe mâ teşâ ve tahtâr mutasarrıfa olsun dedikde mukırra-i merkūmenin ikrâr-ı meşrûhasını el-mukarru leha’l-mezbûr[e] Aynî Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek sene 1045.
Şuhûdü’l-hâl: ( )
|