|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 120 Hüküm no: 102 Orijinal metin no: [64-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Hasan Beşe’nin evinin vârisleri tarafından Hatice bt. Abdullah’a satıldığı
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin iken vefât eden Ali Beşe’nin verâseti zevce-i metrûkesi Hatice bt. Abdullah nâm hâtuna ve li ebeveyn karındaşları Hasan Beşe ve İskender ve Mehmed ve kız karındaşları Altûne ve Ülfet? ve Hanife nâm kimesneler[e] münhasıra olduğu şer‘an mütehakkik oldukdan sonra mezbûr Hasan Beşe kendi tarafından asâleten ve mezbûrûn karındaşları İskender ve Mehmed ve Altûne ve Ülfet? ve Hanife tarafından vekâleten bey‘-i âti’l-beyânı ikrâr[a] vekîl olup mezbûrûn[u] ma‘rifet-i şer‘î ile ârifân olan Ali b. Hasan ve Yusuf b. Hasan nâm kimesneler şehâdetleri ile vekâleti sâbite olan mezbûr Hasan Beşe meclis-i şer‘-i hatîr-i lâzımü’t-tevkīrde işbu râfi‘atü’l-kitâb mezbûre Hatice nâm Hâtun mahzarında asâleten ve vekâleten ikrâr ve takrîr-i kelâm edip müteveffâ-yı merkūmun muhallefâtından olup mahalle-i mezbûrede vâki‘ bir tarafı Ahmed b. İlyas mülkü ve bir tarafı Saliha bt. Abdullah ve bir tarafı Sâime bt. Rıdvan mülkü ve bir tarafı tarîk-i âm ile mahdûd ve mümtâz olan mülk iki bâb tahtânî beyti ve bir kenîfi ve bir su kuyusunu ve zât-ı eşcâr-ı müsmire ve gayr-ı müsmireyi müştemil olan mülk menzilimi mezbûre Hatice’ye hisse-i şâyi‘asından mâ‘adâ nakd-i râyic fi’l-vakt sekiz bin iki yüz elli akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan menzil mezbûre Hatice’nin mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmun asâleten ve vekâleten ikrâr-ı meşrûhunu el-mukarru leha’l-mezbûre Hatice bi’l-muvâcehe tasdîk ve bi’l-müşâfehe [tahkīk] edicek mâ hüve’l-vâki‘ bi’t-taleb ketb olundu. Tahrîren fî evâsıtı Ramazâni’l-mübârek li sene hamsîn ve erba‘în ve elf.
Şuhûdü’l-hâl: Ahmed Efendi b. Abdi el-İmâm, Mahmud Çelebi b. Mehmed es-Serrâc, Mehmed Bey Çalık, Abdi Bey b. Şaban, Mustafa Çelebi b. Halil es-Serrâc, Ali Beşe b. İshak, Ali Beşe [b.] Abdullah, İsmail b. Abdullah ve gayruhüm
|