|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 121 Hüküm no: 103 Orijinal metin no: [65-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa Ağa’ya ait Kağıthâne’deki mülk bağın vekîli Hacı Resul tarafından Kiryak ve Yani’ye satışı
Mahmiye-i İstanbul’da vâki‘ Mi‘mâr Çarşısı kurbunda sâkin Mustafa Ağa b. ( ) nâm kimesne tarafından bey‘-i âti’l-beyânı ikrâra vekîl olup vekâleti el-Hâc Süleyman b. Rüstem ve Mehmed Beşe b. ( ) nâm kimesneler şehâdetleri ile sâbit olan el-Hâc Resul b. Kadri nâm kimesne meclis-i şer‘-i hatîr-i lâzımü’t-tevkīrde işbu râfi‘ayü’l-kitâb Kiryak v. Yani ve Yani v. Yorgi nâm zimmîler mahzarında bi’t-tav‘i’s-sâf ikrâr ve takrîr-i kelâm edip Havâss-ı aliyye kazâsına tâbi‘ Kağıthâne nâm mevzi‘ kurbunda vâki‘ bir tarafı vâdi ve bir tarafı Halil Efendi ile Kokona bağları olup ve bir tarafı tarîk-i âm ve bir tarafı arz-ı hâliyeye muttasıl olan mülk bağını eşcâr-ı müsmire ve gayr-ı müsmiresi ile merkūmân Kiryak ve Yani’ye alâ tarîki’s-seviyye sekiz bin elli nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan bağ merkūmân Kiryak ve Yani’nin mülk-i müşterâlarıdır keyfemâ yeşâ’ân ve yehtârân mutasarrı[f]ân olsunlar dedikde vekîl-i merkūmun ikrâr-ı meşrûhunu el-mukarru lehümü’l-mezbûrân Kiryak ve Yani dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Ramazâni’l-mübârek li sene hamsîn ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Hüseyin Bey b. Mehmed es-Serrâc, Halil Beşe b. Ali, Hüseyin b. Yusuf, Ahmed b. Veli, Mahmud b. Ahmed, Ebûbekir b. Mustafa, Ali b. Abdullah ve gayruhüm
|