.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 121
Hüküm no: 104
Orijinal metin no: [65-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Mosi adlı Yahudinin zevcesi Esterapola bt. Yasef’in mirastan payına düşeni ve mehir alacaklarını tahsil ettiği

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin iken bundan akdem hâlik [olan] Mosi nâm Yahudinin verâseti zevce-i metrûkesi Esterapola bt. Yasef ile babası Yasef v. Salamon nâm Yahudi[ler]e münhasıra olduğu şer‘an mütehakkik oldukdan sonra merkūme Esterapola tarafından husûs-ı âti’z-zikre vekîl olduğu İlya v. Baroh ve Kalef v. Baroh nâm Yahudiler şehâdetleri ile sâbite olan Menahim v. Çenoka nâm Yahudi mahfil-i kazâda işbu râfi‘ü’s-sifr hâlik-i mezbûrun muhallefâtına vâzı‘u’l-yed olduğu şer‘an sâbit olan babası mersûm Yasef muvâcehesinde bi’l-vekâle ikrâr ve takrîr-i kelâm edip müvekkilem mezbûre hâlik-i mezbûrun muhallefâtından ba‘de küll-i hesâb irsen kendiye isâbet eden yedi bin dört yüz akçe hakkını ve hâlik-i mezbûr zimmetinde [66] ma‘kūdun aleyh mehr-i müeccel ve mu‘accelinden yirmi bin akçelik cihâz ta‘bîr olunur metâ‘ını merkūm Yasef yedinden ahz u kabz edip hâlik-i merkūmun li ebeveyn karındaşı Selom nâm Yahudi ve anası Hondi bt. ( ) nâm Yahudiyye zimmetlerinde hâlik-i mersûmun muhallefâtından mâl ıtlâk olunur bir şeyi olmayıp muhallefât-ı merkūmdan dükkân ve sâir terekesine müte‘allik müvekkile-i mezbûrenin vechen mine’l-vücûh alâka ve medhali kalmadı dediklerinden sonra müvekkile-i mezbûreden husûs-ı mezbûr[a] müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâhiri Ramazâni’l-mübârek li sene hamsîn ve erba‘în ve elf.


Şuhûdü’l-hâl: ( )