.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 122
Hüküm no: 105
Orijinal metin no: [66-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen Papa Dido’nun tasarrufundaki tarla ve bağların mirasçıları tarafından Giko v. Istori’ye örfî vergilere de katılmak üzere devredildiği

Vilâyet-i Rumeli’nde vâki‘ Avlona sancağında Ergirikasrı kazâsına tâbi‘ Lamyova? nâm karyede sâkin iken bundan akdem mürd olan Papa Dido v. Kiro nâm zimmînin tarlaları ve bir kıt‘a bağ yeri ve eşcâr-ı müsmire ve gayr-ı müsmiresi yine karye-i mezbûre sükkânından Yani v. Şuğla ve Yaki v. Kotla ve Londa? v. Yorgi ve Neveke v. Giro ve Duka v. Seto ve Todori v. Giro ve Göni v. Yani ve Yani v. Hristo ve Niko v. Çömer? ve Hristo v. Dimo ve Dimo v. İstiko ve Dimo v. İstodo? ve Nikola v. Yani nâm zimmîlere intikāl e[t]tiği şer‘an mütehakkik oldukdan sonra mezbûrûn zimmîler mahfil-i kazâda işbu râfi‘ü’l-kitâb Giko v. İstovi nâm zimmî mahzarında her biri ikrâr ve takrîr-i kelâm edip mürd-i mezbûrun muhallefâtından olup karye-i mezbûrede Yukarı Karye demekle ma‘rûf karyede kilise kurbunda vâki‘ lede’l-ahâlî ve’l-cîrân ma‘lûmü’l-hudûd dâhilinde olan bir kıt‘a menzil yerini ve bir kıt‘a bağ yerini ve ma‘lûmü’l-hudûd dâhilinde olan dut ağaçlarını ve koz ağaçlarını ve mürd-i mezbûrun tasarrufunda olan cümle tarlalarını merkūm Giko’ya nakd-i râyic fi’l-vakt dokuz bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve mebî‘-i mezbûru mahallinde kabza taslît eyledik keyfemâ yeşâ ve yehtâr mutasarrıf olsun dediklerinden sonra ba‘de’l-yevm müşterî-i mezbûr Giko tekâlîf-i örfiyyenin cümlesini [67] bizimle ma‘an çekmesine der-uhde eylemişdir dediklerinde mukırrûn-ı merkūmûnun ikrâr-ı meşrûhalarını el-mukarru lehü’l-mezbûr Giko vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Şevvâli’l-mükerrem li sene hamsîn ve erba‘în ve elf.


Şuhûdü’l-hâl: ( )