.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 125
Hüküm no: 109
Orijinal metin no: [68-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Ağa b. Mehmed’in şikayeti üzerine komşusu Dimitri’nin evinde açtığı meyhânenin kapatılmasının tembih edildiği

Havâss-ı aliyye kazâsına tâbi‘ Hasköy’de sâkin Dergâh-ı âlî mahfûfen bi’l-me‘âlî Kapı[cı]başılarından fahrü’l-a‘yân Ahmed Ağa b. Mehmed mahfil-i kazâda takrîr-i kelâm edip hâlen câr-ı mülâsıkım olup [69] işbu hâzır bi’l-meclis olan Dimitri v. Kosta nâm zimmî ehl ü ıyâlim ile sâkin olduğum menzilime muttasıl olan menzili içinde meyhâne ihdâs eylemek ile hamr râyihasından ve sekrân feryâdından müte’ellim ve müte’ezzî olduğumdan sonra ehl ü ıyâlim ile sâkin olunmak mümkün olmadığı ecilden cânib-i şer‘den üzerine varılıp men‘ ve def‘ olunmak matlûbumdur dedikde cânib-i şer‘den bizzat ve zeyl-i kitâbda mastûrü’l-esâmi olan müslimîn ile üzerine varılıp nazar olundukda fi’l-hakīka mezbûr Dimitri merkūm Ahmed Ağa’nın menziline muttasıl olan menzili içinde meyhâne ihdâs eylediğin ve hamr râyihasından ve sekrân feryâ[dın]dan müte’ellim ve müte’ezzî olup ehl [ü] ıyâli ile sâkin olunmak mümkün olmadığını müşâhede ettiklerinde mezbûr Dimitri’ye zikr olunan meyhâneyi def‘ etmesine tenbîh birle mâ hüve’l-vâki‘ bi’t-taleb ketb olundu. Tahrîren [fî] evâhiri Zilka‘deti’ş-şerîfe li sene hamsîn ve erba‘în ve elf.


Şuhûdü’l-hâl: İsa Çavuş [b.] Mehmed, Mehmed Bey [b.] Abdülmennân, Mehmed Bey [b.] Abdullah, Mehmed Beşe [b.] Abdullah, Musa Bey serrâc