|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 126 Hüküm no: 111 Orijinal metin no: [70-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Ahmed Ağa’nın eşi Hatice bt. Rıdvan’a olan mehir borcunun yetimlerinin vasîsinden talep edildiği, inkârı üzerine ispat edilerek ödemesinin tembih edilmesi
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin iken bundan akdem fevt olan Ahmed Ağa b. Süleyman’ın zevce-i metrûkesi ve verâsesi olan Hatice bt. Rıdvan nâm hâtun mahfil-i kazâda müteveffâ-yı mezbûrun sulbî sagīr oğulları Mehmed ve Hasan’ın tesviye-i umûrlarına cânib-i şer‘den mansûb vasiyyesi olan İsmihânî bt. Mehmed nâm hâtun mahzarında takrîr-i da‘vâ edip müteveffâ-yı mezbûr zimmetinde ma‘kūdun aleyh olan mehr-i müeccelinden on beş bin nakd-i râyic fi’l-vakt akçe hakkım olup müteveffâ-yı mezbûr hâl-i sıhhatinde huzûr-ı müslimînde i‘tirâf dahi eylemişdir suâl olunup muhallefâtından alıverilmek matlûbumdur dedikde gıbbe’s-suâl ve akībe’l-inkâr mezbûre Hatice’nin sıdk-ı makāline beyyine taleb olundukda udûl-i müslimînden olup mahalle-i mezbûre sâkinlerinden Pîr Ahmed b. Mehmed ve Kubad b. Mustafa nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-hakīka müteveffâ-yı mezbûr Ahmed Bey hâl-i sıhhatinde zevcem mezbûre Hatice’nin ma‘kūdun aleyh mehr-i müeccelinden zimmetinde on beş bin akçe hak vardır deyû bizim huzûrumuzda ikrâr ve i‘tirâf eyledi biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra mezbûre Hatice meblağ-ı mezbûru zevc-i müteveffâ-yı mezbûrdan hâl-i sıhhatinde küllen ve ba‘zan ahz u kabz ve hibe eylemeyip ve vücûh-ı şer‘iyyeden [71] bir vechile zimmetini ibrâ eylemediğine yemîn teklîf olundukda ol dahi ale’l-vechi’l-mes’ûl half billâhi’l-azîm edicek meblağ-ı mezbûru muhallefât-ı mezkûreden mezbûre Hatice’ye edâya vasiyye-i mezbûre[ye] tenbîh birle mâ hüve’l-vâki‘ bi’t-taleb ketb olundu. Tahrîren fî evâhiri Zilhicceti’ş-şerîfe li sene hamsîn ve erba‘în ve elf.
Şuhûdü’l-hâl: Ahmed Efendi b. Abdi el-İmâm, Mustafa Halîfe b. Surûrî el-İmâm, Mehmed Çelebi b. Mustafa el-İmâm, Mehmed Halîfe b. İbrahim el-Müezzin, Mahmud Çelebi b. Mehmed es-Serrâc, Mustafa Çelebi b. Halil es-Serrâc, Ali Beşe b. Abdullah ve gayruhüm
|