|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 128 Hüküm no: 114 Orijinal metin no: [72(1)-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Ahmed Bey’in evinin borçlarının ödenmesi için vârisleri tarafından müzâyede ile Papa Yani’ye satıldığı
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin iken fevt olan Ahmed Bey b. Süleyman’ın verâseti zevce-i metrûkesi Hatice bt. Rıdvan’a ve sulbî sagīr oğulları Mehmed ve Hasan’a münhasıra olduğu mütehakkik oldukda mezbûre Hatice asâleten ve sagīreyn-i mezbûreynin tesviye-i umûruna kıbel-i şer‘den mansûbe vasiyyesi olan İsmihânî bt. Mehmed nâm hâtun mahfil-i kazâda bâ‘is-i hâze’s-sifr Papa Yani v. Dimitri nâm zimmî mahzarında her biri ikrâr ve takrîr-i kelâm edip merhûm mezbûr Ahmed Bey medyûnen vefât edip nukūd ve menkūlünden mahalle-i mezbûrede vâki‘ bir tarafı İbrahim Paşa mülkü ve bir tarafı ba‘zan Zâhide Hâtun ve ba‘zan Ali ve ba‘zan Ali Halîfe mü[l]kleri ve bir tarafı tarîk-i hâs ve bir tarafı tarîk-i âm ile mahdûd ve mümtâz olan iki bâb fevkānî ocaklı odayı ve bir sofayı ve iki bâb tahtânî odayı ve bir sofayı ve bir ahırı ve bir kenîfi ve bir su kuyusunu ve hadîka-i zât-ı eşcâr-ı müsmire ve gayr-ı müsmireyi ve hudûd-ı mezkûre dâhilinde vâki‘ tahmînen bir dönüm bağı muhtevî olan mülk menzilinden gayrı deynine vefâ eder mâlı olmayıp cihet-i karz-ı şer‘îden Ali Çelebi nâm kimesneye olan on bin akçe deyn-i müsbeti ve deyn-i şer‘îden Hatice nâm hâtuna olan beş bin akçe deyn-i müsbeti için menzili mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildikden sonra menzil-i mezbûr Sûk-ı sultânî’de kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra menzil-i mezbûr Papa Yani üzerinde otuz bin nakd-i râyic fi’l-vakt akçede karâr edip ve ziyâde ile tâlib-i âhar zuhûr etmemeğin menzil-i mezbûru asâleten ve vesâyeten merkūm Papa Yani müteveffâ-yı mezbûrun zarûret-i [72(2)] deyni için merkūmü’l-mikdâr otuz bin akçeye bey‘-i kat‘î ile bey‘ edip ol dahi vech-i muharrer üzre iştirâ eyledi[kde]n sonra kabz-ı semen-i ma‘dûd ve teslîm-i mebî‘-i mahdûd eylediklerinde mukırratân-ı mezbûretânın vech-i meşrûh üzre cârî olan ikrârlarını mezbûr Papa Yani bi’l-muvâcehe tasdîk ettikden sonra menzil-i mezbûrun derkine merkūme Hatice emr-i kabûlü hâviye kefâletle kefîl olmağın mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene sittin ve erba‘în ve elf.
Şuhûdü’l-hâl: Ahmed Efendi b. Abdi el-İmâm, Mustafa Halîfe b. Surûrî el-İmâm, Mehmed Çelebi b. Mustafa el-İmâm, Mehmed Halîfe [b.] İbrahim el-Müezzin, Mehmed Çelebi b. Mehmed es-Serrâc, Mustafa Çelebi b. Halil es-Serrâc, Hasan Dede b. Mehmed, Ahmed Bey b. Abdullah, Ahmed Bey b. Hüseyin, Hüseyin Bey b. Mehmed es-Serrâc, Ahmed Çelebi b. Mustafa, Mehmed Çelebi b. Arslan, İbrahim Beşe b. Abdullah er-Râcil, Kubad b. Mustafa el-Hammâl, Pîr Ahmed b. Mehmed el-Hammâl, Ali Beşe b. Abdullah el-muhzır
|