.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 129
Hüküm no: 115
Orijinal metin no: [72(2)-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Nasuh Ağa b. Ahmed’in satın almak üzere anlaşarak bedelinin bir kısmını ödediği Hatice Hâtun bt. Esad Efendi’nin evinin yandığı, ödediği parayı geriye talep ettiği ve sulh oldukları

Husûs-ı âti’l-beyânı tahrîr için medîne-i Hazret-i Ebâ Eyyûb el-Ensârî muzâfâtından Hasköy’de zahrü’l-muhadderât tâcü’l-mestûrât Hatice Hâtun bt. el-merhûm el-mebrûr ed-dâric ilâ mi‘râc-ı rahmeti Rabbihi’l-gafûr Esad Efendi’nin menziline varılıp akd-i meclis olundukda medîne-i mezbûre sükkânından Nasuh Ağa b. Ahmed meclis-i müşârun-ileyhde bâ‘isetü’l-kitâb mûmâ-ileyhâ Hatice Hâtun mahzarında ikrâr ve takrîr-i kelâm edip bundan akdem mezbûre Hatice Hâtun silk-i mülkünde muntazam olup merhûm Sultan Mehmed Hân -tâbe serâhu- kurbunda vâki‘ lede’l-ahâlî ve’l-cîrân ma‘lûmü’l-hudûd ol[a]n menzilini dört yük elli bin akçeye iştirâ murâd eyleyip meblağ-ı mezbûrun yüz on bin akçesini mezbûreye def‘ ve teslîm edip merkūme dahi menzil-i mezbûru bana bey‘ sadedinde iken bi-emrillâhi te‘âlâ ihrâk vâki‘ [73] olup menzil-i mezbûr merkūmenin yedinde iken yanmağla mezbûreye teslîm eylediğim meblağ-ı mezbûru taleb eylediğimde merkūme dahi bey‘-i mezbûr mün‘akid olup menzil-i mezkûru bana teslîmden sonra ihrâk vâki‘ oldu deyicek beynimizde nizâ‘-ı şedîd ve cidâl-i kesîr vâki‘ olmuşdu, el-hâletü hâzihî beynimize muslihûn ve müslimûn tavassut edip meblağ-ı mezbûr için beni üç yüz kâmil riyâlî guruş üzerine ıslâh eylediklerinde ben dahi sulh-ı mezbûru kabûl ve bedel-i sulh olan merkūmü’l-mikdâr üç yüz kâmil riyâlî guruşu mezbûr[ede]n bi’t-tamâm ve’l-kemâl ahz u kabz eyleyip husûs-ı mezbûra müte‘allik olan cemî‘ da‘vâ ve nizâ‘dan mezbûrenin zimmetini ibrâ-i âmm-ı kātı‘ü’n-nizâ‘ ile ibrâ ve ıskāt eyledim ba‘de’l-yevm benden bizzat veya bi’l-vâsıta husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūmu ikrâr-ı meşrûhunda el-mukarru leha’l-mezbûre dahi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Muharremi’l-harâm li sene sittin ve erba‘în ve elf.


Şuhûdü’l-hâl: Fahrü’l-müderrisîni’l-kirâm Mehmed Efendi b. Hüseyin, Mehmed Efendi el-müsta‘id, el-Hâc Mehmed b. Mustafa, Yusuf Beşe b. Abdullah ve gayruhüm