|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 130 Hüküm no: 116 Orijinal metin no: [73-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Billûre bt. Kulu’daki muhtelif eşyanın büyük oğlu Mustafa’ya babasından intikal ettiği ve Billûre’nin elinde emânet olduğu
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine iken fevt olan Billûre bt. Kulu Baba nâm müteveffânın [verâseti] zevc-i metrûku Mehmed Bey b. Himmet’e ve sulbî kebîr oğlu Mustafa’ya ve sulbî sagīr oğlu Musa’ya ve sadriye kebîre kızı Havvâ’ya münhasıra olduğu şer‘an mütehakkik oldukdan sonra mezbûr Mustafa mahfil-i kazâda ve sagīr-i merkūm Musa’nın vasîyy-i şer‘îsi olup mezbûr Mehmed Bey’in dahi vekîl-i şer‘îsi olan Himmet b. Mehmed mahzarlarında takrîr-i da‘vâ edip işbu hâzır bi’l-meclis olan bir beledî döşek ve bir yemeni yorgan ve bir yastık ve iki sahan ve bir tencere ve demir sini bundan akdem vefât eden babamdan irs-i şer‘le bana intikāl edip müteveffât-ı mezbûre yedinden emânetdir, mezbûra suâl olunup takrîrleri tahrîr olunması matlûbu[mdur] dedikde ve gıbbe’s-suâl ve akībe’l-inkâr müdde‘î-i mezbûrdan cevâbına mutâbık beyyine [74] taleb olundukda udûl-i müslimînden olup karye-i mezbûr[e] sükkânından Ömer Beşe b. Mustafa ve Kubad b. Mustafa nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-hakīka müteveffât-ı mezbûre hâl-i hayâtında bizim huzûrumuzda eşyâ-i mezkûre merkūm Mustafa’nın babası ( ) nâm müteveffâdan intikāl eylemişdir deyû ikrâr eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de ri‘âyet-i şerâ’iti’l-kabûl şehâdetleri hayyiz-i kabûlde vâki‘ olmağın bi’t-taleb ketb olundu. Tahrîren fî evâili Zilhicceti’ş-şerîfe li sene hamsîn ve erba‘în ve elf.
Şuhûdü’l-hâl: Mehmed Çelebi b. Mustafa el-İmâm, Mehmed Halîfe, İbrahim el-Müezzin, Hasan b. ( ), Oruc el-Hammâl, Pîr Ahmed hammâl ve gayruhüm
|