|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 131 Hüküm no: 117 Orijinal metin no: [74-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Nikola’ya ait evlerin ve dükkânın talepleri üzerine mirasçısı olan iki kızı arasında taksim edilmesi
Havâss-ı aliyye kazâsına tâbi‘ Hasköy’de sâkin iken bundan akdem hâlik olan Nikola v. ( ) nâm zimmînin verâseti sulbiye kızları Serbeste’ye ve Ezmerağda[’ya] münhasıra olduğu şer‘an mütehakkik oldukdan sonra mezbûre Ezmerağda kend[i] tarafından asâleten ve merkūme Serbeste tarafından husûs-ı âti’l-beyânı taksîm ve ifrâza ve kabza vekîl-i şer‘îsi olan zevci Nikola v. Yani nâm zimmî vekâleten mahfil-i kazâda her biri takrîr-i kelâm edip karye-i mezbûrede vâki‘ bir tarafı Zaharya v. ( ) nâm zimmî mülkü ve üç tarafı tarîk-i âm ile mahdûd ve mümtâz olan iki bâb tahtânî menzilini ve iki bâb fevkānî menzil ve bir dükkân bundan akdem hâlik olan babamız merkūm Nikola’dan irsen ale’l-iştirâki’s-seviy ikimize intikāl eylemeğin hâlen taksîm ve ifrâz murâd eylemişizdir, cânib-i şer‘den üzerine varılıp menzil-i mezbûre taksîm ve ta‘yîn ve her birinin hissesi tavzîh ve tebyîn olunmak [murâd] ederiz dedikde, cânib-i şer‘den bizzat ve hâssa mi‘mârlardan Üstâd Kara Mehmed b. Abdullah ve zeyl-i kitâbda mastûrü’l-esâmi olan bî-garaz kimesneler ile menzil-i mezbûra varılıp mesâha olundukda tûlen ve arzan bi-hesâbi’ş-şatrancî bennâ zirâ‘ıyla yüz iki zirâ‘ arsa üzerinde olan sâlifü’z-zikr bir bâb tahtânî mahzeni ve bir dükkân ve bir bâb fevkānî ocaksız oda ki çarşı tarafıdır mezbûre Ezmerağda vekîl-i merkūmun rızâsıyla kabûl ve kabz edip ve tûlen ve arzan bi-hesâb-ı şatrancî bennâ zirâ‘ıyla yüz yedi zirâ‘ arsa üzerinde olan sâlifü’z-zikr bir bâb tahtânî mahzeni ve bir bâb fevkānî ocaklı oda ki mersûme Zaharya mülkü tarafıdır mezbûre Ezmerağda rızâsıyla vekîl-i merkūm kabûl ve kabz ettikden sonra sâlifü’z-zi[kr] iki hissenin ortasında vâki‘ olan tûlen on iki zirâ‘ duvar beyinlerinde müşterek olup mâ hüve’l-vâki‘ bi’t-taleb ketb olundu. Tahrîren fî evâili Zilhicceti’ş-şerîfe li sene hamsîn ve erba‘în ve elf.
Şuhûdü’l-hâl: Receb Beşe [b.] İbrahim, Allahverdi b. Hasan, Receb b. Abdullah, Ali b. Abdullah, Mihal v. Yani, Kosta v. Dimitri
|