.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 132
Hüküm no: 120
Orijinal metin no: [75-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Rizo v. Apostol ile Yorgi v. Rizo’nun Papa Yani’ye borçlu olduklarını ikrârları

Havâss-ı aliyye kazâsına tâbi‘ Hasköy’de sâkin mumcu tâ’ifesinden Rizo v. Apostol ve Yorgi v. Rizo nâm zimmîler meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Papa Yani v. Dimitri nâm zimmî mahzarında bi’t-tav‘i’s-sâf ikrâr ve takrîr-i kelâm edip mezbûr Papa Yani’ye cihet-i karz-ı şer‘îden ikimizin alâ tarîki’s-seviy nakd-i râyic fi’l-vakt on yedi bin akçe deynimiz olup meblağ-ı mezbûr on yedi bin akçe [76] zimmetimizde lâzımü’l-edâ ve vâcibü’l-kazâ deynimizdir dediklerinde mukırrân-ı merkūmânın ikrâr-ı meşrûhlarını el-mukarru lehü’l-mezbûr Papa Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel li sene sittin ve erba‘în ve elf.


Şuhûdü’l-hâl: Mahmud Çelebi b. Mehmed es-Serrâc, Hüseyin Bey b. Mehmed es-Serrâc, Mustafa b. İbrahim, Mustafa b. Hamza, Mustafa b. Ali, Hüseyin b. Abdullah, Memo v. Kizo ve gayruhüm