.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 133
Hüküm no: 121
Orijinal metin no: [76-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Bey b. Abdülmennân’ın icâreteynle mutasarrıf olduğu vakıf evin tasarruf hakkını Salamon v. Avraham’a devrettiği

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin Ahmed Bey b. Abdülmennân nâm kimesne meclis-i şer‘-i hatîr-i lâzımü’t-tevkīrde ikrâr-ı âti’l-beyânı tasdîke Salamon v. Avraham nâm Yahudi cânibinden vekîl olup İlya v. Kemel ve Kemel v. Aslan nâm Yahudiler şehâdetleriyle vekâleti sâbite olan oğlu İsak nâm Yahudi mahzarında bi’t-tav‘i’s-sâf ikrâr ve takrîr-i kelâm edip merhûm Ahmed Çelebi Vakfı’ndan olup karye-i mezbûre mahallâtından Pîrî Paşa mahallesinde vâki‘ üç tarafı vakf-ı mezbûr mülkü ve bir tarafı tarîk-i âm ile mahdûd ve mümtâz olan dört bâb fevkānî odayı ve iki bâb küçük kileri ve bir şehnişîni ve tûlen beş zirâ‘ ve arzan iki zirâ‘ tahta bendi ve bir kenîfi ve bir bâb ahırı ve bir su kuyusunu müştemil olup vakf-ı mezbûrdan icâre-i müeccele ve mu‘accele ile mutasarrıf olduğumuz menzilin hakk-ı tasarrufunu vakf-ı mezbûrun mütevellîsi izniyle müvekkilim merkūma tefvîz eyledim, ol dahi vech-i mübeyyen üzre tefevvuz ve kabûl eyleyip mukābele-i tefvîzde vekîl-i merkūm yedinden nakd-i râyic fi’l-vakt kırk beş bin akçe alıp kabz eyledim, mâdem ki beher mâh zikr olunan menzilin icâre-i müeccelesin vakf-ı mezbûre zâbitlerine edâ ve îfâ eyleye, tasarrufuna bir ferd mâni‘ olmaya dedikde, mukırr-ı merkūmun ikrâr-ı meşrûhunu vekîl-i merkūm İsak bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ılâhir sene sittin ve erba‘în ve elf.


Şuhûdü’l-hâl: Mehmed Çelebi b. Mustafa el-İmâm, Mahmud Çelebi b. Mehmed es-Serrâc, el-Hâc Hüseyin b. Abdullah, Ali Beşe b. Ahmed, Abdülbâkī? b. Abdülmennân, Mehmed Halîfe b. İbrahim el-Müezzin, Mahmud b. Ahmed ve gayruhüm Bin kırk yedi târihinin sicillâtıdır. Zeynüddin Efendi hazretleri zamânında vâkı‘a şüd.