.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 134
Hüküm no: 123
Orijinal metin no: [77-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Silivri’de bulunan meyhânelerin bağ ve bahçelere içki servisi yapmalarının menedilmesine dâir talep

Medîne-i Hazret-i Ebâ Eyyûb el-Ensârî -radiye anhü Rabbühi’l-Bârî- muzâfâtından kasaba-i Siliv[r]i ahâlîsinden Ahmed Bey b. Abdülmennân ve Mahmud Bey b. Mirza ve Mehmed Bey b. Hüseyin serbölük ve Ahmed Çelebi b. Muslu ve Mahmud [b.] Mehmed es-Serrâc ve İbrahim Beşe [b.] Mustafa ve Mehmed Bey b. Abdullah ve Ahmed Efendi el-İmâm ve Mehmed Efendi el-İmâm ve Mehmed b. Bilal ve Hüseyin Beşe b. Yusuf ve el-Hâc Ramazan b. ( ) nâm kimesneler ve sâirleri ve zimmî tâ’ifesinden Mihal v. Yani ve Anka v. Mavrodi ve Dimitri v. Kosta ve ve Kirbaki v. Yani ve Zaharya v. Astifos ve Aristos v. Yani ve sâirleri meclis-i şer‘a gelip yine kasaba-i mezbûrede vâki‘ olan meyhânelerin müste’cirlerinden Anastas v. İstefo ve Nikola v. Dimo ve Yorgi v. Nikola nâm zimmîler muvâcehesinde her biri takrîr-i kelâm edip hergâh mezbûrûn meyhâneciler kasaba-i mezbûrede vâki‘ olan bostanlar ve bahçelere desti ile ve tulum [ile] hamr ve arak getirip ve şürb-i hamr edenlerin ta‘âmlarını tabh edip bahçelerde ve bostanlarda fısk u fücûr olduğundan gayrı nice fesâd olmakdan hâlî değildir, cânib-i kavîmden her birine muhkem tenbîh olunup men‘ ve def‘ olunmasın taleb ederiz dediklerinde, gıbbe’s-suâl mezbûrûn meyhâneciler cevâbında fi’l-hakīka bu âna gelince kasaba-i merkūmede olan bostanlarda ve bahçelerde şürb-i hamr edenlere desti ve tulum ile hamr ve arak gönderirdik lâkin hâkimü’ş-şer‘ tarafından tenbîh olunmamışdır deyû cevâb verdiklerinden ( ). ( ) Fakīr, hakīr, melikü’l-kâdir’in kullarının en muhtâcı Dedezâde diye meşhûr olan Mehmed b. Mustafa, a‘lemü’l-ulemâ’i’l-izâm ve efdalü’l-fuzalâ’i’l-kirâm [Ebû Eyyûb el-Ensârî aleyhi rahmetü’l-Bârî kadısı Zeynelâbidin Efendi] Hazret-i zeynü’l-milleti ve’d-dîn -lâ zâle muvakkaran ilâ yevmi’d-dîn- tarafından ahkâm-ı şer‘-i şerîf ve’d-dîn -lâ zâle bâkıyyeyne ilâ vakti fenâ’i’l-mâ’ı ve’t-tîn- icrâ etmek üzre ta‘yîn edildi. Fî gurreti Cumâdelâhire li sene seb‘in ve erba‘în ba‘de’l-elf.