|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 135 Hüküm no: 125 Orijinal metin no: [78-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sefer v. Pîrli’nin beğenmezse geri vermek şartıyla satın aldığı iki kara sığır öküzünü satıcı Cihan’a iadesi
Mahmiye-i Hazret-i Ebâ Eyyûb el-Ensârî -aleyhi’r-rıdvân ve rahmetü’l-Bârî- kazâsına tâbi‘ Hasköy sükkânından Sefer v. Pîrli nâm Ermeni meclis-i şer‘-i hatîr-i lâzımü’t-teşrîfe Cihan v. Fedayi nâm Ermeni’yi ihzâr ve mahzarında takrîr-i da‘vâ edip târih-i kitâbdan üç gün mukaddem mezbûr Cihan’dan iki re’s kara sığır öküzünü iki bin sekiz yüz fıddî râyic fi’l-vakt akçeye üç güne değin muhayyer olmak üzre iştirâ eyledim, şimdi hıyârım sebebiyle eyyâm-ı hıyâr içre merkūm Cihan’a red etmek isterim, mezbûr Cihan muhâlefet eder suâl olunmasın taleb ederin dedikde, gıbbe’s-suâl merkūm Cihan cevâbında fi’l-hakīka iki bin sekiz yüz akçeye zikr olunan iki re’s kara sığır öküzünü bey‘ ettim lâkin bey‘imizde şart-ı hıyâr yok idi deyû şart-ı hıyârı inkâr etmeğin, müdde‘î-i mezbûrdan da‘vâsına mutâbık beyyine taleb olundukda ityân-ı beyyineden izhâr-ı acz edip zikr olunan iki re’s kara sığır öküzünü iki bin sekiz yüz akçeye bana şart-ı hıyâr ile bey‘ eylemediğin mersûm Cihan’a yemîn verilsin dedikde gıbbe’l-istihlâfi’ş-şer‘î merkūm Cihan yemînden nükūl etmeğin zikr olunan iki re’s kara sığır öküzün mezbûr Cihan’ın üzerine red birle hükm olunup mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min Cumâdelâhire li sene seb‘in ve erba‘în ve elf.
Şuhûdü’l-hâl: Mustafa Efendi b. Mehmed el-müsta‘id, Mehmed Efendi b. Mehmed, Mustafa Halîfe b. Receb, Ali b. ( ) el-muhzır
|