|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 136 Hüküm no: 126 Orijinal metin no: [79-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa b. Halil’in Akive v. Elyezer’e olan kira borcuna Mehmed b. Bilal’in kefil olduğu
Oldur ki Hasköy nâm karyede Turşucu mahallesi sâkinlerinden Mehmed b. Bilal nâm kimesne mahfil-i kazâda Akive v. Elyezer nâm Yahudi mahzarında takrîr-i kelâm edip mezbûr Akive’ye karye-i mezbûrede merhûm Pîrî Paşa binâ eylediği mescid-i şerîf kurbunda vâki‘ olan pereme yerleri kirâsından bin dört yüz elli akçe deyni olan işbu hâzır fi’l-meclis yine mahalle-i mezbûre sâkinlerinden Mustafa bin Halil’e kefîl bi’l-mâl oldum dedikde gıbbe’t-tasdîk ve’l-kabûl mâ hüve’l-vâki‘ bi’t-taleb ketb ü imlâ olundu. Tahrîren fi’l-yevmi’s-sâbi‘ min Cumâdelâhire li sene seb‘in ve erba‘în ve elf.
Şuhûdü’l-hâl: Mustafa Efendi b. Mehmed el-müsta‘id, Mehmed b. İsa, Mustafa b. Sefer, Mustafa b. Receb
|