|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 136 Hüküm no: 128 Orijinal metin no: [79-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ömer b. Hasan’ın Bayandır v. Gülbeği adlı zimmî tarafından darp edildiği iddiasının doğru olmadığı
Oldur ki Hasköy nâm karyede bi’l-fi‘il subaşı olan fahrü’l-akrân Ömer Bey meclis-i şer‘de takrîr-i merâm edip yine karye-i mezbûre mahallâtından Turşucu mahallesinde sâkin Ömer b. Hasan nâm kimesne gece ile yatsıdan sonra karye-i mezkûrede mecrûhan bulundu, üzerine varılıp keşf olunmasın matlûbumdur dedikde, cânib-i şer‘-i kavîmden zikirleri âtî olan müslümânlar ile Mehmed Efendi irsâl olunup istikşâf olundukda başı üzre ve sol kaşı üstünde yarası olup istintâk olundukda cevâbında, gece ile yatsıdan sonra geliyordum beni işbu hâmilü’[l]-kitâb yine mahalle-i merkūme sükkânından Bayandır v. Gülbeği nâm zimmî darb etti lâkin ne ile darb ettiğin bilmem dedikde, mezbûr Mehmed Efendi minvâl-i meşrûh üzre bile olan müslümânlar ile mahkeme-i şerîfede ihbâr ettiklerinde mezbûr Ömer Bey mesfûr Bayandır’ın ahvâli ahâlî[-i] mahallesinde suâl olunsun, bu makūle fesâdı ve töhmesi varmıdır dedikde, merkūm Bayandır’ın ahvâli mahalle-i mezbûre ahâlîsinden Mehmed Efendi b. İbrahim el-İmâm ve Hoca Mehmed Efendi el-Müezzin ve Mehmed Efendi b. İbrahim ve Mehmed Efendi b. Mustafa ve Şahin Çavuş b. Abdullah ve Mehmed Beşe b. Abdullah ve [80] Mehmed b. Abdullah ve İbrahim b. Yusuf el-Cündî nâm kimesneler meclis-i şer‘-i şerîfe da‘vet olunup mezbûr Bayandır nâm zimmînin ahvâlinden istifsâr olundukda cevâblarında, merkūm zimmînin bu asıl fesâdını ve bir gayrı töhme-i sâbıkasını görmedik, dâimâ kendi hâlinde olup hilâf-ı şer‘-i mutahhar evzâ‘ı görülmemişdir deyû ihbâr ettiklerinde, mâ vaka‘a kayd şüd. Tahrîren fi’l-yevmi’s-sâmin min Cumâdelâhire li sene seb‘in ve erba‘în ve elf.
Şuhûdü’l-hâl: Mustafa Efendi b. Mehmed el-müsta‘id, Mehmed b. İbrahim, Mehmed Paşa b. Abdullah, Mustafa b. Receb
|