.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 137
Hüküm no: 130
Orijinal metin no: [80-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hrito v. Rizo’nun Andreya v. Todori’den talep ettiği alacağın ödenmesine hükmedildiği

Oldur ki Hrito v. Rizo nâm zimmî meclis-i şer‘-i hatîr-i lâzımü’t-tevkīre Andreya v. Todori nâm zimmîyi ihzâr ve mahzarında takrîr-i da‘vâ edip mezbûr Andreya’nın zimmetinde şem‘-i revgan bahâsından bin sekiz yüz seksen beş akçe hakkım vardır suâl olunup alıverilmesi matlûbumdur dedikde, gıbbe’s-suâl merkūm Andreya cevâbında fi’l-hakīka mesfûr Hrito’ya şem‘-i revgan bahâsından bin sekiz yüz seksen beş akçe deynim var idi lâkin kendinin karındaşı Yorgi nâm zimmîye mezbûr Hrito’ya îsâl için meblağ-ı merkūmu verdim, anın yedinden mezkûr Hrito’ya vâsıl oldu dedikde, gıbbe’l-inkâr mezbûr Andreya’dan sıdk-ı makāline mutâbık beyyine taleb olundukda ityân-ı beyyineden izhâr-ı acz edip merkūm Hrito karındaşı mesfûr Yorgi nâm zimmî yedinden îsâl eylediğim bin sekiz yüz seksen beş akçe deynimi almadığına yemîn verilsin dedikde, mezkûr Hrito meblağ-ı merkūm bin sekiz yüz seksen beş akçe hakkını karındaşı merkūm Yorgi nâm zimmî yedinden almadığına yemîn billâhi’l-azîz ellezî enzele’l-İncîle alâ İsa -aleyhi’s-selâm- ettikde meblağ-ı mezbûr bin sekiz yüz seksen beş akçenin edâsına hüküm birle kayd şüd. Tahrîren fi’l-yevmi’t-tâsi‘ min Cumâdelâhire li sene seb‘in ve erba‘în ve elf.


Şuhûdü’l-hâl: Mustafa b. Mehmed, Mustafa b. Receb