.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 138
Hüküm no: 131
Orijinal metin no: [81-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Akive v. Elyezer’in kayıkhane kirasından alacağı olduğu Mustafa Çelebi’nin borcunu ödemesi gerektiği

Da‘vâ-yı Akive Hasköy sükkânından Akive v. Elyezer nâm Yahudi meclis-i şer‘-i lâzımü’t-teşrîfe yine karye-i mezbûrede Turşucu mahallesinde sâkin olan Mustafa b. Halil nâm kimesneyi ihzâr ve mahzarında takrîr-i da‘vâ edip mezbûr Mustafa Çele[b]i zimmetinde karye-i mezbûrda Pîrî Paşa merhûm binâ eylediği mescid-i şerîf kurbunda vâki‘ olan pereme yerlerim icâresinden ba‘de küllî hesâb bin dört yüz elli akçe hakkım vardır suâl olunup ihkāk-ı hak olunmak matlûbumdur dedikde, gıbbe’s-suâl mezbûr Mustafa cevâbında fi’l-hakīka bin dört yüz elli akçe minvâl-i meşrûh üzre deynim var idi, lâkin sekiz yüz elli akçesini edâ eyledim, altı yüz akçe deynim kaldı dedikde, mezbûr Mustafa’dan takrîrine mutâbık beyyine taleb olundukda ityân-ı beyyineden izhâr-ı acz edip mezbûr Mustafa meblağ-ı mezkûr sekiz yüz elli akçeyi mesfûr Akive benden almadığına tahlîf olunsun dedikde, Akive mersûm dahi meblağ-ı mesfûre sekiz yüz elli akçeyi almadığına yemîn billâhi’l-azîz ellezî enzele’t-Tevrâte alâ Musa -aleyhi’s-selâm- ettikde merkūm Akive’ye bin dört yüz elli akçenin edâsına hüküm birle mâ vaka‘a kayd şüd. Tahrîren fi’l-yevmi’r-râbi‘ min Cumâdelâhire li sene seb‘in ve erba‘în ve elf.


Şuhûdü’l-hâl: Mustafa b. Mehmed, Mustafa b. Receb, Mehmed b. Mustafa