.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 139
Hüküm no: 132
Orijinal metin no: [81-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mahalle halkının şikayeti üzerine şakiliği tespit edilen Mustafa b. Ömer’in mahalleden ihracı

Mahmiye-i Hazret-i Ebâ Eyyûb el-Ensârî -aleyhi rahmetü’l-Bârî- muzâfâtından Hasköy nâm karyede merhûm ve mağfûrun-leh Pîrî Paşa mahallesi ahâlîsinden Şaban Bey b. Ali el-Cündî ve Mehmed b. Hasan er-Râcil ve Yusuf b. Hüseyin serrâc-ı hâssa ve Ali b. Mehmed er-Râcil ve Mehmed b. Ahmed ve Mehmed b. Abdullah ve sâirleri meclis-i şer‘-i şerîfe mahalle-i mezbûre sâkinlerinden Mustafa b. Ömer nâm kimesneyi ihzâr ve mahzarında takrîr-i merâm edip mezbûr Mustafa dâimâ fesâd üzre olmağla mahalle-i mezbûrede müslimîne ezâdan hâlî olmadığından mâ‘adâ şakī ve bed-fa‘âl olup sû’-i hâlinden cümlemiz rencîde olmağın mahalle[-i] mezbûre[den] ihrâc olunması için cânib-i şer‘-i kavîmden tenbîh olunmak taleb ederiz dediklerinde, gıbbe’s-suâl ve akībe’l-inkâr mezbûrun şekāsına ahâlî-i mahalle-i mezbûreden hurûcuna kıbel-i şer‘den tenbîh olunup mâ vaka‘a kayd şüd. Tahrîren fî evâsıtı Cumâdelâhire li sene seb‘in ve erba‘în ve elfŞuhûdü’l-hâl: Mustafa Efendi b. Mehmed, Mahmud Bey b. ( ) el-Cündî, Mehmed b. Abdullah, Mustafa b. Receb, Ömer Bey b. ( ) er-Râcil ve gayruhüm mine’l-hâzırîn