|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 141 Hüküm no: 137 Orijinal metin no: [83-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Efendi b. Ali Efendi’nin bostan yeri hisselerini Halil Efendi b. Zülfikar’a sattığı
Dârü’s-saltanati’s-seniyye Kostantıniyyetü’l-mahmiyye -humiyet ani’l-beliyye- sâkinlerinden a‘lemü’l-ulemâ’i’l-izâm efdalü’l-fuzalâ’i’l-kirâm Mehmed Efendi b. el-merhûm el-mağfûru leh Ali Efendi eş-şehîr bi-Ali Çelebizâde meclis-i şer‘-i şerîf-i şâmihü’l-bünyân ve mahfil-i dîn-i münîf-i râsihü’l-erkânda fahr-i erbâbi’l-ilm ve’l-iz‘ân zahr-ı ashâbi’l-cûd ve’l-ihsân Halil Efendi b. Zülfikar mahzarında ikrâr ve takrîr-i kelâm edip Havâss-ı aliyye muzâfâtından Hasköy nâm karyede merhûm Pîrî Paşa mahallesinde bir tarafdan yine kendiler mutasarrıf olduğu Pîrî Paşa-yı mezbûr bostanı ve bir tarafdan mecrâ-yı mâ’ ve bir tarafdan merhûm ve mağfûr cennet-mekân huld-âşiyân Sultan Bayezid Hân -aleyhi’r-rahmetü ve’r-rıdvân- Vakfı olup kendi silk-i mülkümde dâhil olan çayır ve bir tarafdan ba‘zan Osman Ağa mülkü ve ba‘zan tarîk-i âm ile mahdûd ve eşcâr-ı müsmire ve gayr-ı müsmireyi müştemil olup bir sehmi merkūm Halil Efendi’nin ve iki sehmi kendi mülk-i mevrûsum yine merhûm-ı mezbûr vakfı bostan yerinde olan sehmeyn-i mezkûreynimi mûmâ-ileyh Halil Efendi’ye on dokuz bin râyic fi’l-vakt akçeye bey‘-i bâtt-ı kat‘î ile bey‘ eyleyip kabz-ı semen ve teslîm-i mebî‘ eyledim [84] müşârun-ileyh Halil Efendi dahi vech-i meşrûh üzre iştirâ ve kabûl eyledi, ba‘de’l-yevm mülk-i müşterâsıdır keyfemâ yeşâ ve yehtâr tasarruf eyleye deyû buyurduklarında mezbûr Halil Efendi dahi gıbbe’t-tasdîk vicâhen mâ hüve’l-vâki‘ bi’t-taleb ketb ü imlâ olundu. Tahrîren fi’l-yevmi’r-râbi‘ aşer min şehri Cumâdelâhire li sene seb‘in ve erba‘în ve elf.
Şuhûdü’l-hâl: Halil b. Mustafa el-Müderris, Halil Efendi b. el-Hacı Çavuş, Şaban Efendi b. el-Hacı Bahşî, Mustafa Efendi b. Mehmed el-Eyyûbî, Mehmed Efendi b. Menteş, Mehmed Efendi b. Mustafa el-İmâm, Mustafa Usta b. Ali, Mustafa Paşa b. Abdullah er-Râcil, Mehmed Paşa b. Abdullah el-mütevellî, Ahmed b. İsmail, Handan b. Abdullah, Ahmed b. Muslu, Mustafa b. Receb
|