|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 141 Hüküm no: 138 Orijinal metin no: [84-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kotnoz v. Piro’nun Yani v. Miho’da alacağı olduğunu ispat etmesi
Oldur ki Üsküdar kazâsına tâbi‘ Çengel nâm karye sâkinlerin[den] Kotnoz v. Piro nâm zimmî meclis-i şer‘-i şerîfe Yani v. Miho nâm zimmîyi ihzâr ve mahzarında takrîr-i da‘vâ edip mezbûr Yani’ye şarâb ve arak bahâsından bin yedi yüz doksan akçe ve Kapana nâm zimmîye olan yüz akçe deynini kendi emri ile edâdan ve kırk akçe dahi Küçük Ahmed nâm kimesneye olan deynini kendi emri ile edâdan ki mecmû‘u bin dokuz yüz otuz akçe hakkım vardır suâl olunup alıverilmesi matlûbumdur dedikde, gıbbe’l-inkâr merkūm Kotnoz’dan da‘vâsına mutâbık beyyine taleb olundukda Mihal v. Piro ve Hıroni? v. Yani nâm zimmîler meclis-i şer‘-i mübîne li ecli’ş-şehâde hâzırân olup mezbûr Kotnoz merkūm Yani’ye bin yedi yüz doksan akçe şarâb ve arak ve Kapana nâm zimmîye olan yine kendi deyni için emîr ile yüz akçe ve Küçük Ahmed nâm kimesneye olan deyni için kendi emri ile kırk akçe vermişdir, bu husûsa şâhidleriz şehâdet dahi ederiz deyû edâ-i şehâdet ettiklerinde, gıbbe ri‘âyeti’l-kabûl şehâdetleri hayyiz-i kabûlde vâki‘ olmağın hüküm birle mâ vaka‘a bi’t-taleb kayd olundu. Tahrîren fi’l-yevmi’r-râbi‘ aşer min şehri Cumâdelâhire li sene seb‘in ve erba‘în ve elf.
Şuhûdü’l-hâl: Dimitri v. Yorgi, Yani v. Yorgi, Mihal v. Hemeftor?
|