|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 143 Hüküm no: 140 Orijinal metin no: [85-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yahuda v. Avraham’ın ev ve bahçesini satmak için Lazar v. Yasef’e vekâlet verdiği
Hasköy sükkânından Mosi v. Avraham nâm Yahudi meclis-i şer‘-i hatîr-i lâzımü’t-tevkīre hâmil-i hâze’l-kitâb Lazar v. Yasef nâm Yahudiyi ihzâr ve mahzarında takrîr-i da‘vâ edip Mahmiye-i Mısır sâkinlerinden ammim Yahuda v. Avraham nâm Yahudinin karye-i mezbûrede vâki‘ beynimizde lede’l-ahâlî ve’l-cîrân hudûdu ma‘lûme olan mülk menzil ve hadîkasını bana tefvîz edip menzil-i mesfûr ve hadîka-i merkūmenin vâki‘ olan umûrunu bana sipâriş etmişiken mezkûr Lazar menzil-i mezbûru ve hadîka-i merkūmeyi bey‘ edip semeni olan meblağı merkūm Yahuda’ya îsâl ederim deyû tasarrufuma mâni‘ olur suâl olunması matlûbumdur dedikde, gıbbe’l-istintâk cevâbında fi’l-vâki‘ menzil-i mezbûru ve hadîka-i merkūmeyi biraz zamâna değin mezbûr Mosi’ye tefvîz etmişdi, lâkin ba‘dehû merkūm Yahuda menzil-i merkūmu ve hadîka-i mesfûreyi bey‘ edip semeni olan meblağı kendi tarafına îsâle beni vekîl ettiğini müdde‘î-i mezbûr muvâcehesinde isbât etmişdim, yedimde hüccet-i şer‘iyye dahi vardır deyip bin kırk yedi Saferü’l-hayrının sekizinci günü ile müverraha ve târih-i mezbû[r]da karye-i mezkûre mahkemesinde nâibü’ş-şer‘ olan Mevlânâ Hasan Efendi imzâsıyla mümzâ ve hâtemi ile mahtûm mazmûnu takrîrine muvâfık ve mefhûmu müdde‘âsını nâtık hüccet-i şer‘iyye ibrâz edip kırâ’at olundukda merkūm Mosi mazmûn-ı hücceti inkâr ile mukābele eylemeğin merkūm Lazar’dan hüccet-i mesfûreye beyyine taleb olundukda, zeylinde esâmisi mestûre olan şuhûd-ı meclisden Abdünnebi b. Veli ve Mahmud b. Hasan nâm kimesneler li ecli’ş-şehâde mahfil-i kazâya hâzırân olup münkir-i mezbûr muvâcehesinde istişhâd olundukda fi’l-hakīka menzil-i mahdûd-ı mezkûr ve hadîka-i mersûmeyi bey‘ ve semeni olan meblağı merkūm Yahuda’ya îsâline mezbûr Lazar vekâletin isbât eylemişdir ve yedindeki hüccet-i vekâlet müdde‘î-i mezbûr Mosi muvâcehesinde bizim huzûrumuzda ketb olunmuşdur, bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde şehâdetleri ba‘de ri‘âyet-i şerâ’iti’l-kabûl hayyiz-i kabûlde vâkı‘a oldukda mûcebiyle hüküm birle mâ vaka‘a kayd şüd. Tahrîren fi’l-yevmi’s-sâdis aşer min şehri Cumâdelâhire li sene seb‘in ve erba‘în ve elf.
Şuhûdü’l-hâl: Davud Efendi b. Ahmed el-Müderris el-Eyyûbî, Mustafa Efendi b. Mehmed el-müsta‘id el-Eyyûbî, Hüseyin b. Sefer el-Müezzin el-Eyyûbî, Mustafa b. Receb el-Eyyûbî, Mahmud Ağa b. Mirza el-Cündî, Mehmed b. Mustafa el-İmâm, Mehmed Beşe b. Abdullah, Ahmed Çelebi b. Muslu el-Hammâmî, Hoca Kemal v. Kemal tercüman, Mosi v. Avraham Uhricet ani’s-sicilli’l-mahfûz harrerehü’l-fakīr ileyhi.
|