.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 144
Hüküm no: 141
Orijinal metin no: [86-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasköy halkının talebi ile kolluk yerinin kaldırılmayarak eski yerinde kalmasına karar verildiği

Havâss-ı aliyye kazâsına tâbi‘ Hasköy nâm karye ahâlîsinden Mustafa b. Ali üstâd-ı Hadîka-i sultânî ve Mahmud Çelebi b. Mehmed serrâc-ı hâssa ve Mahmud Ağa b. Mirza el-Cündî ve Abdi Bey b. Şaban serrâc-ı hâssa ve Mahmud Beşe b. Abdullah er-Râcil ve Hasan b. Mehmed ve Mehmed b. Mustafa el-İmâm ve Mehmed Hoca el-Müezzin ve Kadri b. Hüseyin ve Ahmed Çelebi b. Mustafa el-Cündî ve Hüseyin b. Mehmed serrâc-ı hâssa ve zimmî tâ’ifesinden Erzenos v. Yani ve Dimitri v. Kosta ve Angeli v. Mavridi ve Mihal v. Yani ve Zaharya v. İstefo ve Yani v. İspalepo ve Yahud tâ’ifesinden Yasef v. Avraham ve A[v]raham v. Kemal ve Haron v. İsrail ve Sâlel v. Sâlel ve İlya v. Kemal nâm Yahudiler meclis-i şer‘-i şerîfde takrîr-i kelâm edip karye-i mezbûre mustahfızı olan kimesneler için hâlen oturdukları kolluk nişîmeni izn-i şer‘-i mutahharla ve cümle ahâlî-i karyenin rızâsıyla vaz‘ olunup mukaddemâ yedimize izin hücceti dahi verilmişdir, şimdi ba‘zı kimesneler mâni‘ olmaları mesmû‘umuz oldu, karyemizde vaz‘-ı kadîm üzre olan kolluk nişîmeni karyemizi hıfza enseb ve ahrâ ve cümlemize zararı olmayıp belki min külli’l-vücûh enfa‘ ve evlâ olmağın te’kîden li’l-asl yine cânib-i şer‘-i şerîfden izin taleb ederiz dediklerinde, nişîmen-i mezbûr olageldiği üzre kolluk yeri olmasına izin birle mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min şehri Cumâdelâhire li sene seb‘in ve erba‘în ve elf.


Şuhûdü’l-hâl: Mustafa b. Receb, Mustafa b. Mehmed, Mahmud b. Abdullah ve gayruhüm mine’l-hâzırîn