|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 144 Hüküm no: 142 Orijinal metin no: [86-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yani v. Miho ile Fetnoz v. Petro’daki alacak davasında Fetnoz’un borcun tamamını ödediğine dâir yemin ettiği
Oldur ki Yani v. Miho nâm zimmî meclis-i şer‘-i şerîfe hâmilü’l-kitâb Fetnoz v. Petro nâm zimmîyi ihzâr ve mahzarında takrîr-i da‘vâ edip mezbûr Fetnoz’da bin üç yüz akçe cihet-i karzdan ve bin iki yüz nakid akçeye dahi altı ay kendiye hizmet etmeğe nefsimi istîcâr ve ben dahi îcâr edip altı ay hizmetim ücretinden mecmû‘u iki bin beş yüz akçe hakkım olup bin altı yüz akçesin aldım, şimdi zimmetinde dokuz yüz akçe hakkım vardır, suâl olunup alıverilmesi matlûbumdur dedikde, gıbbe’s-suâl mezbûr Fetnoz cevâbında bin üç yüz akçe cihet-i karzdan ve üç yüz akçeye dahi bir buçuk ay hizmeti ücretinden mecmû‘u edâsına ikrâr ettiği bin altı yüz akçeden gayrı deynim yokdur deyû merkūm Yani’nin müdde‘âsı olan dokuz yüz akçeyi inkâr edicek, merkūm Yani’den da‘vâsına mutâbık beyyine taleb olundukda izhâr-ı acz edip mezbûr Yani merkūm Fetnoz’da hizmetim ücretinden dokuz yüz akçe hakkım olmadığına yemîn verilsin dedikde mesfûr Fetnoz mezkûr Yani’nin hizmeti ücretinden dokuz yüz akçe hakkı olmadığına yemîn billâhi’l-azîz ellezî enzele’l-İncîle alâ İsa -aleyhi’s-selâm- ettikde mûcebiyle hüküm birle mâ vaka‘a ketb olundu. Tahrîren fi’l-yevmi’r-râbi‘ aşer min şehri Cumâde[l]âhire li sene seb‘in ve erba‘în ve elf.
Şuhûdü’l-hâl: Dimitri v. Yorgi, Yani v. Yorgi, Mihal v. Hemeftor?
|