|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 145 Hüküm no: 143 Orijinal metin no: [87-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sirkeci Süleyman’ın dükkân kirasından İsak v. Salamon’a borcu olduğu
Hasköy sükkânından İsak v. Salamon nâm Yahudi meclis-i şer‘a karye-i mezbûrdan bâyi‘-i hâl olan Süleyman b. Ali’yi ihzâr ve mahzarında takrîr-i da‘vâ edip karye-i merkūmede Pîrî Paşa Mescid[i] kurbunda kendi silk-i mülkümde olan sirkeci dükkânım kirâsından bin iki yüz akçe hakkım var idi, altı yüz elli akçesin aldım, bâkī zimmetinde beş yüz elli akçe hakkım vardır, suâl olunup alıverilmesi matlûbumdur dediğinde, mezbûr Süleyman cevâbında fi’l-hakīka beş yüz elli akçe hakkı var idi, lâkin edâ eyledim dediğinde, gıbbe’l-istişhâd ve isre’l-acz merkūm İsak’a yemîn verilip yemîn ettiğinde meblağ-ı merkūm beş yüz elli akçenin merkūm İsak’a edâsıyla hükm olunduğu tescîl olundu. Tahrîren fi’l-yevmi’l-hâmis aşer min Cumâdelâhire li sene seb‘in ve erba‘în ve elf.
Şuhûdü’l-hâl: Ali b. Hüseyin, Mustafa b. Receb
|