.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 145
Hüküm no: 145
Orijinal metin no: [87-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsteryano’nun Dimitri’ye sattığı mum bedelinden kalan alacağını talebinde haklı olduğu

Oldur ki Üsküdar sâkinlerinden İsteryano v. Dimitri meclis-i şer‘-i şerîfe yine Üsküdar sâkinlerinden Dimitri v. Papas nâm zimmîyi ihzâr ve mahzarında takrîr-i da‘vâ edip mukaddemâ mezbûr Dimitri’ye iki bin akçelik şem‘-i revgan bey‘ edip bin beş yüz akçesin merkūm Dimitri’den aldım, hâlen zimmetinde beş yüz akçe hakkım vardır, suâl olunup alıverilmesi matlûbumdur dediğinde, gıbbe’s-suâl mezbûr Dimitri cevâbında fi’l-vâki‘ şem‘-i revgan bahâsından zimmetimde beş yüz akçe bâkī kalmışidi, lâkin edâ eyledim dediğinde, mezbûr İsteryano inkâr ile mukābele eylemeğin mezbûr Dimitri’den sıdk-ı makāli için beyyine taleb olundukda ikāmet-i beyyineden izhâr-ı acz edip merkūm İsteryano’ya beş yüz akçe hakkını benden almadığına yemîn verilsin dediğinde yemîn billâhi’l-azîz ellezî enzele’l-İncîle alâ İsa -aleyhi’s-selâm- edip mezbûr Dimitri’ye meblağ-ı merkūm beş yüz akçenin edâsına hükm olunduğu tescîl-i şer‘î olundu. Tahrîren fi’l-yevmi’l-ışrîn min şehri Cumâdelâhire li sene seb‘in ve erba‘în ve elf.


Şuhûdü’l-hâl: Mustafa b. Mehmed, Mustafa b. Receb ve gayruhüm