.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 146
Hüküm no: 146
Orijinal metin no: [88-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Akive v. Elyezer ile Gavril v. Senyore arasında muhtelif alışverişten kalan borcun Akive’ye ödenmesi

Hasköy nâm karye sâkinlerinden Akive v. Elyezer nâm Yahudi meclis-i şer‘-i şerîf-i lâzımü’t-teşrîfe Gavril v. Senyore nâm Yahudiyi ihzâr ve mahzarında takrîr-i da‘vâ edip mezbûr Gavril’in zimmetinde elli bin akçe cihet-i karzdan ve üç yüz zirâ‘ Bodrum çuka bahâsından her zirâ‘ı yüz yirmişer akçeye olmak üzre ki otuz altı bin akçe eder, mecmû‘u seksen altı bin akçe hakkım var idi, lâkin bir def‘a yirmi dört bin altı yüz yetmiş akçelik gön aldım ve bir def‘a on iki bin yedi yüz yirmi beş akçelik hamr aldım, hâlen zimmetinde kırk sekiz bin altı yüz yetmiş beş akçe hakkım olduğuna defâ‘at ile ikrâr eylemişdir, suâl olunup ihkāk-ı hak olunması matlûbumdur dedikde, gıbbe’s-suâl ve akībe’l-inkâr ve isre’l-istişhâd Hayem v. Kalime ve Yako v. Samriye nâm Yahudiler li ecli’ş-şehâde meclis-i şer‘-i şerîfe hâzırân olup mezbûr Gavril bizim huzûrumuzda merkūm Akive’ye elli bin akçe cihet-i karzdan ve üç yüz zirâ‘ Bodrum çuka bahâsından her zirâ‘ı yüz yirmişer akçeye olmak üzre ki otuz altı bin akçe eder mecmû‘u seksen altı bin akçe deynim var idi, lâkin bir def‘a yirmi dört bin altı yüz akçe gön verdim ve bir def‘a on iki bin yedi yüz yirmi beş akçe hamr verdim, hâlen zimmetimde kırk sekiz bin altı yüz yetmiş beş akçe hakkı vardır deyû ikrâr eylemişdir, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a oldukdan sonra mesfûr Gavril meblağ-ı merkūm kırk sekiz bin altı yüz yetmiş beş akçenin mezbûr Akive’ye edâ etmesine hüküm birle mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Cumâdelâhire li sene seb‘in ve erba‘în ve elf.


Şuhûdü’l-hâl: Abdi b. Hasan, Mustafa b. Mehmed er-Râcil, İbrahim b. Halil, Mustafa b. Receb, Ali Beşe b. Abdullah, İlya v. Haskiya, Yakut v. Mosi