.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 147
Hüküm no: 148
Orijinal metin no: [89-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen Derviş adlı zimmînin kölesi Asvador’u azat ettiği

Hâfızü hâze’l-kitâb uzun boylu gök gözlü açık kaşlı sağ kolunda yara nişânları olan Rûsiyyü’l-asl Asvador nâm zimmî emred meclis-i şer‘-i şerîf-i lâzımü’t-teşrîfde tevâbi‘-i kazâ-i Havâss-ı aliyye’den Hasköy nâm karye mahallâtından Abdüsselam mahallesinde sâkin iken mürd olan Derviş nâm zimmînin sulbiye kızları Kenar ve Tamam ve zevce-i metrûkesi Yaki mahzarında takrîr-i da‘vâ edip mezbûr Derviş’in abd-i memlûkü olup hâl-i hayâtında bana oğlum deyip âzâd etmişiken merkūmât Kenar ve Tamam ve Yaki bana rıkkıyet üzre vaz‘-ı yed etmek isterler, hâlen ıtkımı taleb ederim dedikde, gıbbe’s-suâl mezbûrât Kenar ve Tamam ve Yaki husûs-ı mezbûreyi münkirât olup istişhâd olundukda Mıgırdiç v. Asuzader ve Cihan v. Fedayi nâm zimmîler li ecli’ş-şehâde mahfil-i kazâya hâzırân olup fi’l-vâki‘ merkūm Derviş abd-i memlûkü olan mersûm Asvador’u hâl-i hayâtında ve kemâl-i sıhhatinde oğlumdur demiş idi, bu minvâl üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri gıbbe ri‘âyet-i şerâ’iti’l-kabûl hayyiz-i kabûlde vâkı‘a oldukdan sonra mûcebi üzre merkūm Asvador’un ıtkına hükm olunup mâ vaka‘a bi’t-taleb ketb olundu. Tahrîren fi’l-yevmi’t-tâsi‘ aşer min Cumâdelâhire li sene seb‘in ve erba‘în ve elf.


Şuhûdü’l-hâl: Mustafa Efendi b. Mehmed, Ali Beşe b. Mustafa, Ali Beşe b. Abdullah, Mustafa b. Receb, Ferhad v. Şehbar, Asuzader? v. Askidar?, Fedi v. Hazarus, Arzhan? v. Serkis, Ağacan v. Hanes