.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 148
Hüküm no: 149
Orijinal metin no: [89-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Pereme satışı hususundaki davada, Ferahzad’ın satış akdinin karşılıklı feshedildiği iddiasını ispatlayamadığı

Oldur ki Hasköy nâm karye sâkinlerinden Bahtiyar v. Mircan nâm zimmî meclis-i şer‘-i şerîfde Ferahzad v. Serkis nâm zimmîyi ihzâr ve mahzarında takrîr-i da‘vâ edip târih-i kitâbdan yedi ay mukaddem mezbûr Ferahzad’a üç bin yüz akçeye bir pereme bey‘ edip iki bin yedi yüz yirmi akçesin aldım, hâlen zimmetinde üç yüz seksen akçe hakkım vardır, suâl olunup alıverilmesi matlûbumdur dedikde, gıbbe’s-suâl mezbûr Ferahzad cevâbında fi’l-vâki‘ müdde‘î-i merkūmdan yedi ay mukaddem üç bin yüz akçeye bir pereme almışdım, lâkin geri kendi ile ikāle [90] eylemişidik, ba‘de’l-ikāle akd-i cedîd ile iki bin yedi yüz yirmi akçeye merkūm peremeyi bana bey‘ edip tarafeynden kabz-ı semen ve teslîm-i mebî‘ etmişizdir dedikde, mesfûr Ferahzad’dan takrîr-i meşrûhuna mutâbık beyyine taleb olundukda ikāmet-i beyyineden izhâr-ı acz edip mezkûr Bahtiyar ikāle-i mezbûre olup akd-i cedîd ile merkūm peremeyi iki bin yedi yüz yirmi akçeye bey‘ etmediğine yemîn verilsin dedikde, merkūm Bahtiyar bey‘-i mezbûru ikāle etmeyip bey‘-i cedîd eylemediğine? yemîn billâhi’l-azîz ellezî enzele’l-İncîle alâ İsa -aleyhi’s-selâm- ettiğinde mûcebiyle hüküm birle mâ vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Cumâdelâhire li sene seb‘in ve erba‘în ve elf.


Şuhûdü’l-hâl: Manik v. Anberkeşe?, Ferşad v. Yeni ve gayruhüm