|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 148 Hüküm no: 150 Orijinal metin no: [90-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kostantin ve İstemad adlı meyhânecilerin meyhânelerini sabaha kadar kapatmadıkları ve mahalle içinde fesâda sebep oldukları yolundaki şikayet üzerine uyarıldıkları
Oldur ki Hasköy sâkinlerinden Kemal v. Marol nâm Yahudi meclis-i şer‘-i şerîfe Kostantin v. Yorgi ve İstemad v. Yani nâm zimmîleri ihzâr ve mahzarlarında takrîr-i kelâm edip mezbûrân Kostantin ve İstemad şirket üzre câr-ı mülâsıkım olan meyhâneyi tutup içinde hamr satarlar, lâkin gündüzün sat[tı]klarından mâ‘adâ gece ile bile aslâ meyhâneleri kapanmayıp sabahlara dek hamr satıp bî-vakt zamânlarda erâzil doldurup bütün gece çalma ve çığırma ettirip bütün gece meyhânelerinde ateş sönmez, mezbûrların bu evzâ‘ı câ’iz ki mahalle içinde nice fesâda mü’eddî ola, suâl olunup bu makūle evzâ‘dan men‘ olunmaları matlûbumdur dedikde, gıbbe’s-suâl ve akībe’l-inkâr mezbûr Kemal’den da‘vâsına mutâbık beyyine taleb olundukda Avraham v. Navin ve Yahya v. İlya nâm Yahudiler meclis-i şer‘-i şerîfe li ecli’ş-şehâde hâzırân olup fi’l-vâki‘ merkūmân Kostantin ve İstemad şirket üzre tuttukları meyhânede gece ile meyhânelerin işledip sabahlara dek hamr satıp bî-vakt zamânlarda erâzil doldurup bütün gece çalma ve çığırma olur ve sabah olunca ateşleri dahi sönmez, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri ba‘de ri‘âyet-i şerâ’iti’l-kabûl hayyiz-i kabûlde vâki‘ olmağın mezbûrân Kostantin ve İstemad bu makūle fesâdları etmemelerine tenbîh birle mâ vaka‘a kayd şüd. Tahrîren fi’l-yevmi’l-hâmis ve’l-ışrîn min Cumâdelâhire li sene seb‘in ve erba‘în ve elf.
Şuhûdü’l-hâl: David v. Murdehay, İsak v. Yako, Konor v. Revon? ve gayruhüm mine’l-hâzırîn
|