.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 149
Hüküm no: 152
Orijinal metin no: [91-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yasef ile Panariye’nin ölen babaları Salamon’un sağlığında borcu karşılığında evinin bir kısmını anneleri Furuste’ye verdiği

Oldur ki Hasköy sükkânından Yasef v. Salamon ve kız karındaşı Panariye bt. Salamon nâm Yahudi ve Yahudiye mahfil-i kazâda anaları Furuste bt. Yahuda Tizbi mahzarında takrîr-i kelâm ve ta‘bîr ani’l-merâm edip karye-i mezbûrede Yahudi mahallesinde vâki‘ beş bâb fevkānî odayı ve bir matbahı ve fırını ve kenîfi ve tahtânî iki bâb odayı ve bir bâb mahzeni ve bir matbahı ve kenîfi ve fırını ve bi’r-i mâ’ı ve muhavvatayı müştemil olup bir tarafı Râhil nâm Yahudiye mülküne ve bir tarafı İlyaoğlu mülküne ve bir tarafı tarîk-i âm ve bir tarafı tarîk-i hâs ile mahdûd olan menzil bundan akdem mürd olan babamız Salamon nâm Yahudinin mülkü olup lâkin babam mezbûr Salamon’un cihet-i karzdan anamız mezbûre Furuste’ye yirmi bin akçe deyni mukābelesinde menzil-i mezbûrun Râhil ile İlyaoğlu [92] mülkleri tarafında olan fevkānî üç oda ve matbah ve kenîf ve fırın ve tahtânî iki bâb oda ve matbah ve kenîf ve fırını ba‘de’t-tahliye temlîk ve teslîm edip ve anamız mezkûre Furuste dahi temellük ve tesellüm etmişdir, menzil-i merkūmdan mikdâr-ı ma‘dûd anamız mezbûre Furuste’nin mülküdür deyû merkūmân Salamon ve karındaşı Panariye bi’t-tav‘i’s-sâf ikrâr ve i‘tirâf ettiklerinde anaları el-mukarru leha’l-mezbûre dahi tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min Recebi’l-mürecceb li sene seb‘in ve erba‘în ve elf.


Şuhûdü’l-hâl: Mustafa Efendi b. Mehmed el-müsta‘id, Mustafa b. Receb, Ali Beşe b. Abdullah, Samoyel v. Mosi, Yahudi v. Yağab, Ramasi v. Kalef, Yahudi v. Yasef, İlya v. Baro