.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 150
Hüküm no: 153
Orijinal metin no: [92-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yasef ile Panariye’nin ölen babaları Salamon’un sağlığında çeyiz borcu karşılığında evinin bir kısmını anneleri Furuste’ye verdiği

Oldur ki Hasköy sükkânından Yasef v. Salamon ve kız karındaşı Panariye bt. Salamon nâm Yahudi ve Yahudiye mahfil-i kazâda anaları Furuste bt. Yahudi Tizbi mahzarında takrîr-i kelâm ve ta‘bîr ani’l-merâm edip karye-i mezbûrede Yahudi mahallesinde vâki‘ beş bâb fevkānî odayı ve bir matbahı ve fırını ve kenîfi ve tahtânî iki bâb oda ve bir bâb mahzeni ve bir matbahı ve kenîfi ve fırını ve bi’r-i mâ’ı ve muhavvatayı müştemil olup bir tarafı Râhil nâm Yahudiye mülküne ve bir tarafı İlyaoğlu mülküne ve bir tarafı tarîk-i âm ve bir tarafı tarîk-i hâs ile mahdûd olan menzil bundan akdem mürd olan babamız Salamon nâm Yahudinin mülkü olup lâkin babamız merkūm Salamon anamız merkūme Furuste’ye kendi cihâzın bahâsından yüz elli yedi bin dokuz yüz yetmiş iki akçe deyninden elli yedi bin dokuz yüz yetmiş iki akçe mukābelesinde menzil-i mezbûrdan tarîk-i hâssa tarafında olan iki bâb fevkānî odayı ve tahtânî bir mahzeni ve bi’r-i mâ’ı ve muhavvata-i yesîreyi ba‘de’t-tahliye temlîk ve teslîm edip mezkûre anamız Furuste dahi temellük ve tesellüm etmişdir, menzil-i merkūmun mikdâr-ı ma‘dûdu anamız mesfûre Furuste’nin mülküdür deyû mesfûrân Yasef ve kız karındaşı Panariye bi’t-tav‘i’s-sâf ikrâr ve i‘tirâf ettiklerinde el-mukarru leha’l-merkūme anaları [93] Furuste dahi vicâhen tasdîk ve şifâhen tahkīk edicek mâ vaka‘a bi’t-taleb ketb [olundu.] Tahrîren fi’l-yevmi’r-râbi‘ min [Re]cebi’l-mürecceb li sene seb‘in ve erba‘în ve elf.


Şuhûdü’l-hâl: Samoyel v. Mosi, Yahudi v. Yağab, Ramasi v. Kalef, Yahudi v. Yasef, İlya v. Yazo