.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 151
Hüküm no: 154
Orijinal metin no: [93-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Esterkekile bt. Yahudabâli’nin miras yoluyla kendisine intikal eden evdeki hisselerini ölen kocasının kardeşi Salamon’a sattığı

Oldur ki Hasköy sâkinelerinden Esterkekile bt. Yahudabâli nâm Yahudiye meclis-i şer‘-i şerîfde Yasef v. Salamon ve kız karındaşı Panariye bt. Salamon nâm Yahudi ve Yahudiye mahzarlarında takrîr-i kelâm edip târih-i kitâbdan mukaddem mürd olan zevcim Yasef v. İlya ve karındaşı mezbûrân Yasef ve Panariye’nin babaları Salamon v. İlya nâm Yahudiler ber vech-i iştirâki’s-seviy mutasarrıf oldukları karye-i mezbûrede Yahudi mahallesinde bir tarafı İlyaoğlu mülkü ve bir tarafı Râhil mülkü ve bir tarafı tarîk-i âm ve bir tarafı tarîk-i hâs ile mahdûd olup fevkānî bir odayı ki merkūmân Yasef ve Panariye’nin babaları Salamon üzerine bir oda ve altına bir mahzen binâ etmişdir ve merkūm Salamon üzerine binâ ihdâs eylediği bahçeyi ve kenîfi müştemil olan mülk menzillerinin nısf-ı şâyi‘inden zevcim merkūm Yasef mürd [olup] verâseti benden hâsıl olan sadrî veledleri İlya ve Yani nâm Yahudilere ve bana münhasıra olup alâ mâ farazallâhü te‘âlâ menzil-i mezbûrun nısfı sehimlerinden sümünü bana ve yedi sehmi mezbûrân İlya ve Yani’ye intikāl edip lâkin yedi ikiye müstakīm olmamağla sehimlerini aded-i re’slerine darbdan hâsıl olan on dört sehimden mezbûrân İlya ve Yani’ye yedişer sehim âid olup ba‘de zamân merkūm İlya dahi mürd olup verâseti bana ve li eb ve üm karındaşı mezbûr Yani’ye münhasıra olup alâ mâ farazallâhü te‘âlâ menzil-i mezbûrun nısfından mesfûr İlya’ya irs-i şer‘î ile intikāl eden yedi sehmin sülüsü bana bâkīsi merkūm Yani’ye intikāl edip lâkin yedi sehimden sülüs çıkmak mümkün olmamağın yediyi asl-ı mes’eleye ki üçdür darbdan hâsıl olan yirmi bir sehminin sülüsü olan yedi sehmi bana âid olup bâkī kalan on dört sehmi mesfûr Yani’ye âid olup ba‘de zamân merkūm Yani dahi mürd olup verâseti bana ve merkūmân Yasef ve Panariye’nin babaları olan ammisi mezkûr Salamon’a münhasıra olup alâ mâ farazallâhü te‘âlâ menzil-i mezbûrun nısfından merkūm Yani’ye irs-i şer‘î ile intikāl eden ön dört sehminin sülüsü bana ve bâkīsi merkūm Salamon’a intikāl edip lâkin on dört sehimden sülüs çıkmak mümkün olmamağla on dördü asl-ı mes’eleye ki üçdür darbdan hâsıl olan kırk ikinin sülüsü olan on dört sehmi bana bâkīsi ammisi mezbûr Salamon’a âid olup münâsaha tarîki ile bu tashîhden hâsıl ve bana âid olan menzil-i mezbûr-ı müşterekin nısfından minvâl-i meşrûh üzre merkūm Yasef’den bir sümün ve sadrî oğullarım mezkûrân İlya ve Yani’den iki sülüs sehimlerimi menzil-i mezbûrda müşterek olan merkūmân Yasef ve Panariye’nin babaları mersûm Salamon’a altı bin nakd-i râyicü’l-vakt akçeye bey‘-i bâtt-ı kat‘î ile bey‘ edip kabz-ı semen ve teslîm-i mebî‘ eylemiş idim, menzil-i merkūmda vechen mine’l-vücûh alâkam kalmamışdır deyû mesfûre Esterkelile bi’t-tav‘ ve’r-rızâ ikrâr [ve] i‘tirâf [94] ettikde mezkûrân Yasef ve Panariye dahi bi’l-muvâcehe tasdîk ve bi’l-mü[şâfehe] tahkīk edicek mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Receb[i’l-mürecceb] li sene seb‘in ve erba‘în ve elf.


Şuhûdü’l-hâl: Samoyel v. Mosi, Yahuda v. Yakob, Ramasi v. Kalef, Yahuda v. Yasef, İlya v. Yaro