.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 153
Hüküm no: 157
Orijinal metin no: [95-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yasef ile Panariye’nin ölen babaları Salamon’un sağlığında evinin bir kısmını vakfederek evlâdına şart ettiği yolundaki iddialarının reddedildiği

Hasköy demekle ma‘rûfe karye sâkinlerinden Yasef v. Salamon ve li ebeveyn kız karındaşı Panariye nâm Yahudiyye [meclis-i] şer‘-i şerîf-i lâzımü’t-teşrîfde anaları olup menzil-i mahdûd-ı âti’l-beyâna vâzı‘atü’l-yed idiği şer‘an sâbite [olan] Furuste bt. Yahuda Tizbi nâm Yahudiyye mahzarında takrîr-i da‘vâ edip babamız olup hâlik olan mezbûr Salamon [hâ]l-i hayâtında karye-i mezbûrede Yahudi mahallesinde vâki‘ beş bâb fevkānî odayı ve bir matbahı ve fırını ve kenîfi [ve b]i’r-i mâ’ı ve muhavvatayı müştemil olup bir tarafı Râhil nâm Yahudiye mülkü ve bir tarafı İlyaoğlu mülkü ve bir tarafı tarîk-i âm [ve] bir tarafı tarîk-i hâs ile mahdûd olan mülk menzilinden tarîk-i hâs tarafında olan iki bâb fevkānî [o]dayı ve bir tahtânî mahzeni ve bi’r-i mâ’ı ve muhavvata-i yesîreyi ba‘de’l-ifrâz târih-i kitâbdan kırk yıl mukaddem vakf-ı sahîh ile vakfedip ve tescîl ve teslîm ile’l-mütevellî edip tevliyet ve süknâsını ikimize şart etmiş iken mezbûre Furuste bi-gayrı hakkın vaz‘-ı yed etmişdir, tevliyetimiz hasebiyle kasr-ı yed ettirilip bize teslîm olunmak matlûbumuzdur, suâl olunsun dediklerinde gıbbe’s-suâl mezbûre Furuste cevâbında fi’l-vâki‘ menzil-i mahdûd-ı mezbûr sadrî veledlerim merkūmân Yasef ve Panariye’nin babaları zevcim olan mezbûr Salamon’un mukaddemâ mülkü idi, lâkin hâl-i hayâtında bana elli bin akçeye bey‘ ve teslîm ve semen-i mezbûru zimmetinde hakkım olan elli bin akçe mehr-i mu‘accelim ile takas etmişidik vech-i merkūm üzre vakfedip tescîl-i şer‘î ve teslîm-i mütevellî ettiği ma‘lûmum değildir deyû inkâr ile mukābele etmeğin mezbûrân Yasef ve Panariye’den da‘vâlarına mutâbık beyyine taleb olundukda ikāmet-i beyyineden âcizler olup istihlâf ettiklerinde mezbûr Salamon’un menzil-i mahdûd-ı mesfûru teslîm ve tescîli hâvî vakf-ı sahîh ile vakıf idiğine ilmi olmadığına anaları mezbûr Furuste’ye yemîn teklîf olundukda ol dahi yemîn billâhi’l-azîz ellezî enzele’t-Tevrâte alâ Musa -aleyhi’s-selâm- etmeğin mezbûrân Yasef ve Panariye da‘vâlarından men‘ olunup mâ vaka‘a bi’t-taleb kayd şüd. Tahrîren fi’l-yevmi’s-sâlis ve’l-ışrîn min Recebi’l-ferd li sene seb‘in ve erba‘în ve elf.


Şuhûdü’l-hâl: Ahmed b. Muslu, Hasan b. Sefer, Mustafa b. Receb, Mustafa b. Mehmed, Simon v. Mosi, Ramasi v. Kalef, Yahuda v. Yakob, Yahuda v. Yasef, İlya v. Baro ve gayruhüm mine’l-hâzırîn