|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 154 Hüküm no: 158 Orijinal metin no: [95-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yeminini bozan Muharrem b. Mustafa’nın karısı Cennet bt. Pîrî’den boşanmış sayıldığı
Hasköy demekle ma‘rûfe karye mahallâtından Kiremitçi Ahmed Çelebi mahallesi sâkinelerinden Cennet bt. Pîrî nâm hâtun meclis-i şer‘-i mutahhara zevci olan Muharrem b. Mustafa nâm kimesneyi ihzâr ve muvâcehesinde takrîr-i da‘vâ edip târih-i kitâbdan dört ay mukaddem eğer hâlen sâkine olduğun menzilden taşra çıkarsan talâk-ı selâse ile mutallaka ol deyû yemîn etmişdi, ben ol menzilinden âhar yere nakl etmekle mezbûr Muharrem hânis olmuşdur suâl olunup üzerime dâhil olmaması matlûbumdur dedikde, gıbbe’s-suâl ve akībe’l-inkâr ve isre’l-istişhâd Abdi b. Hasan nâm kimesne ve Mercan bt. Veli ve Âfitâb bt. Abdullah nâm hâtunlar li ecli’ş-şehâde hâzırûn olup fi’l-vâki‘ mezbûr Muharrem zevce-i merkūme Cennet Hâtun’a eğer hâlen sâkine olduğun menzilden taşra çıkarsan talâk-ı selâse ile mutallaka ol deyû yemîn edip mezbûr[e] Cennet dahi ol menzilden taşra çıkmağla mesfûr Muharrem hânis olmuşdur, biz husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri ba‘de ri‘âyet-i şerâ’iti’l-kabûl hayyiz-i kabûlde vâkı‘a olıcak mûcebiyle hüküm birle mâ vaka‘a bi’t-taleb ketb olundu. Tahrîren fi’l-yevmi’l-hâmis min Şa‘bâni’l-mu‘azzam li sene seb‘in ve erba‘în ve elf.
Şuhûdü’l-hâl: Mahmud b. Mirza el-Cündî, Mehmed b. Mehmed, Hasan b. İbrahim, Mustafa b. Receb, Ali Beşe b. Abdullah ve gayruhüm mine’l-hâzırîn
|