|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 155 Hüküm no: 160 Orijinal metin no: [96-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Çelebi b. Muslu’nun babasından intikal eden ve çocukluğunda Mahmud Bey’e devrettiği vakıf oda ve dükkânlar için emsâl bedel olmadığından fark talebi davasında sulh oldukları
Oldur ki Havâss-ı aliyye kazâsına tâbi‘ Hasköy demekle ma‘rûfe karye mahallâtından Kiremitçi Ahmed Çelebi mahallesi sâkinlerinden Ahmed Çelebi b. Muslu nâm kimesne mahfil-i kazâda yine mahalle[-i] mezbûre sükkânından hâmil-i hâze’l-kitâb Mahmud Bey b. Mirza nâm cündî mahzarında takrîr-i kelâm ve ta‘bîr ani’l-merâm edip karye-i mezbûrede merhûm Pîr Mehmed Paşa İskelesi’nde vâki‘ bir taraf-ı deryâ ve bir tarafı mezbûr Pîr Mehmed Paşa Vakfı olan debbağhâneler ve bir tarafı tarîk-i âm ve bir tarafı mersûme iskele ile mahdûd ve mümtâz yine merhûm-ı mezbûrun vakfından olup kānûn-ı kadîm üzre babamdan intikāl edip icâre-i mu‘accele ve müeccele ile mutasarrıf olduğum beynimizde ma‘lûmü’l-aded fevkānî odalar ve tahtânî dekâkîn-i müte‘addidenin hakk-ı tasarrufunu mukaddemâ vakf-ı merkūmun mütevellîsi izni ile mezkûr Mahmud Bey’e tefvîz, ol dahi tefevvuz edip mukābele-i tefvîzde mesfûr Mahmud Bey yedinden fıddî-i Osmânî râyicü’l-vakt on bir bin akçe alıp kabz eyledim idi, lâkin hîn-i tefvîzde ben hadd-i bülûğda olmamağla müzâyede olundukda rağabât-ı nâs bi’l-külliye munkatı‘a olmadığını bilmediğimden meblağ-ı mezbûr mahdûd-ı mezkûrun bedel-i misli olmayıp bana gadr olmuşdur, hâlen mahdûd-ı mezbûrun yevm-i tefvîzdeki bedel-i mislini taleb edip suâl olundukda merkūm Mahmud Bey müdde‘â-yı mezbûru inkâr ile cevâb verip beynimizde münâza‘ât-ı kesîre vâkı‘a oldukda muslihûn tavassut edip mâbeynimizi beş bin nakid fıddî râyicü’l-vakt akçe ve beynimizde ma‘lûmü’l-kıymet bir mutallâ tülbent üzerine inkârdan sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş bin akçeyi ve tülbent-i mersûmu bi’t-tamâm alıp kabz edip min ba‘d husûs-ı mezbûra müte‘allik da‘vâ ve husûmât ve eymân ve muhâsamâtdan mezbûr Mahmud Bey’in zimmetini bi’l-külliye ibrâ-i âmm-ı kātı‘ü’n-nizâ‘la ibrâ ve ıskāt eyledim deyû bi’t-tav‘ ve’r-rızâ ikrâr ve i‘tirâf ettiğinde el-mukarru lehü’l-mezbûr dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ü imlâ olundu. Tahrîren fi’l-yevmi’r-râbi‘ ve’l-ışrîn min Recebi’l-ferd li sene seb‘in ve erba‘în ve elf.
Şuhûdü’l-hâl: Halil Efendi b. Zülfikar, Mehmed Efendi b. Mustafa, Mustafa Efendi b. Mehmed, Mehmed Halîfe b. İbrahim el-Müezzin, Mehmed Bey b. Abdullah, Abdi Bey b. Şaban, Ali Beşe b. Ahmed, Memi b. Halil, Mustafa b. Receb, Mahmud b. Mehmed serrâc-ı hâssa, Ahmed Ağa b. Abdülmennân, Mehmed b. Abdullah serbölük ve gayruhüm mine’l-hâzırîn
|