.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 156
Hüküm no: 161
Orijinal metin no: [97-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kerime bt. Mehmed Kapudân’ın kaçan câriyesi nedeniyle töhmet altında kalan Kosta v. Duka’nın suçsuz olduğunun anlaşıldığı

Hasköy demekle ma‘rûfe karye mahallâtından merhû[m] ve mağfûr Pîrî Paşa mahallesinde sâkine Kerime bt. Mehmed Kapudân nâm hâtun tarafından ikrâr-ı âti’z-zikre vekîl olup Muslu Çavuş b. Mehmed ve Hüseyin b. Ahmed nâm kimesneler şehâdetleri ile vekâleti sâbite olan karındaşı Bâkī Çelebi nâm kimesne meclis-i şer‘-i şerîfde hâmil-i hâze’l-kitâb Kosta v. Duka nâm zimmî muvâcehesinde ikrâr ve takrîr-i kelâm edip müvekkilem mezbûre Kerime fülân nâm câriyesi ibâk edip ve suâl olundukda beni merkūm Kosta ayart[d]ı idi demekle müvekkile-i mezbûre Kerime merkūm Kosta ile muhâsamât-ı kesîre ve münâza‘ât-ı vâfiresi olup hîn-i tefahhusda cürmü olmadığı zâhir ve bâhir olduğu cemî‘ vekâletim hasebiyle de‘âvî ve muhâsamâtdan merkūm Kosta’nın zimmetini ibrâ-i âmm-ı kātı‘ü’n-nizâ‘ ile ibrâ edip ol dahi merkūme Kerime’nin zimmetini husûs-ı mezbûra müte‘allik da‘vâ ve nizâ‘dan ibrâ etmişdir, dediğinde vekîl-i mezbûr Bâkī Çelebi[‘yi] ikrâr-ı meşrûhunda el-mukarru lehü’l-merkūm dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb kayd şüd. [Şuhûdü’l-hâl:] Hamdi b. Muharrem, Pîrî b. Rıdvan, Mehmed b. Mustafa, Osman b. Abdullah