.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 158
Hüküm no: 165
Orijinal metin no: [98-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Defterdâr İbrahim Efendi Vakfı’na ait kiremit fırınının mutasarrıflarından olup vefat eden Seyyid Mehmed Efendi’nin hisselerinin vakfa intikal ettiği ve Hatice Hanım’a icâreteynle kiralandığı

Mahrûse-i İstanbul’da vâki‘ merkūm Defterdâr İbrahim Efendi Vakfı’na evlâddan olup meşrûtiyyet üzre mütevellî olan fahrü’l-a‘yân Mahmud Çelebi b. Mehmed meclis-i şer‘-i şerîfde umdetü’l-muvakkarât zübdetü’l-muhadderât tâcü’l-mestûrât Hatice Hanım bt. Mihrişah Sultan hazretlerinin zevci ve ikrâr-ı âti’l-beyânı tasdîke ve âharı tevkîle me’zûn olup mûmâ-ileyhâyı ma‘rifet-i şer‘iyye ile ârifân olan İbrahim Ağa b. Ali ve Mustafa Ağa b. Mehmed şehâdetleriyle vekâleti sâbite olan mefharü’l-e‘âzımi’l-kirâm muhtâr-ı mülûkü’l-İslâm ve umdetü’l-ümerâ’i’l-fihâm hâlen nişâncı olan Mustafa Paşa -yesserallâhu mâ yeşâ- hazretleri taraflarından tasdîk-i mezkûre vekîl olup şâhidân-ı mezbûrân şehâdetleriyle vekâleti sâbite olan zahrü’l-emâsil ve’l-a‘yân Mustafa Ağa b. Ali mahzarında ikrâr ve i‘tirâf edip vakf-ı mezbûrdan Hazret-i Ebâ Eyyûb el-Ensârî -aleyhi rahmetü Rabbihi’l-Bârî- kazâsına tâbi‘ Hasköy’de vâki‘ bir tarafı sâhil-i bahr ve bir tarafı İlya Yahudi fırını ve bir tarafı mütevellî-i mezbûr mülkü ve bir tarafı Kethüdâ Kadın Vakfı ve bir tarafı ba‘zan tarîk-i âm ile mahdûd bir bâb kiremitçi fırını ve alât ve levâzım ve tevâbi‘-i ma‘lûmesinin yirmi dört sehminde on beş sehmi icâre-i mu‘accele ve müeccele ile tasarrufunda olan cennet-mekân firdevs-âşiyân sâbıkan şeyhülislâm olan Hüseyin Efendi fevt oldukda [99] oğlu Seyyid Mehmed Efendi ve kerimeleri zübdetü’l-mu‘azzamât Hayrî Hâtun ve Emine Hâtun’a ber vech-i âdî ale’s-seviyye intikāl edip mutasarrıflar iken merkūm Seyyid Mehmed Efendi fevt olup mutasarrıf olduğu beş sehim vakfa intikāl ettikde ve fırın-ı mezbûrun yine yirmi dört sehimden dokuz sehmine icâre-i mu‘accele ve müeccele ile mutasarrıf olan merhûm Musa Paşa fevt olup hissesi oğlu Ahmed’e ve kızı Âişe’ye ale’s-seviyye intikāl ettikden sonra kızı mezkûre Âişe fevt olup tasarrufunda olan dört buçuk sehim vakfa intikāl ettikde hâlen mezkûr Seyyid Mehmed Efendi mahlûlünden beş sehim ve mezbûre Âişe mahlûlünden dört buçuk sehim cem‘an dokuz buçuk sehmi icâre-i mu‘accele ile îcâr olunmak vakfa enfa‘ olmağın mûmâ-ileyhâ Hatice Hanım hazretlerine yüz yetmiş bin nakd-i râyic fi’l-vakt akçe icâre-i mu‘accele ve her yevm altı buçuk akçe icâre-i müeccele ile tevliyetim hasebiyle îcâr edip vekîl-i mezbûr dahi istîcâr ve kabûl ettikden sonra zikr olunan yüz yetmiş bin akçe icâre-i mu‘acceleyi vakıf için ahz u kabz eyledim ba‘de’l-yevm zikr olunan fırının yirmi dört sehimden dokuz buçuk sehmi müşârun-ileyhânın müfevvazıdır dedikde mütevellî-i mezbûrun ikrâr-ı meşrûhunu vekîl-i merkūm bi’l-muvâcehe tasdîk etmeğin mâ vaka‘a bi’t-taleb ketb olundu. Tahrîren fî evâili Zilka‘deti’ş-şerîfe li sene seb‘in ve erba‘în ve elf.


Şuhûdü’l-hâl: Derviş Bey b. ( ), Hüseyin Bey b. Behram, Ali Bey b. Mahmud, Hasib Efendi b. Ahmed, Mahmud Çelebi b. Mehmed es-Serrâc, Abdi Bey b. Şaban es-Serrâc, Mahmud Bey b. Mirza el-Cündî, Abdülkādir b. Mustafa, Şaban b. Mustafa, Mehmed Çelebi b. Mustafa el-İmâm