.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 159
Hüküm no: 166
Orijinal metin no: [99-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Zâhide bt. Abdullah’ın bilinen mirasçısı olmadığından terekesinin beytülmâle intikal ettiği

Havâss-ı aliyye kazâsına tâbi‘ Hasköy’de bi’l-fi‘il subaşı ve beytülmâl emîni olan fahrü’l-akrân Ömer Bey nâm cündînin vekîl-i şer‘îsi olan Mustafa Bey b. Mehmed nâm cündî mahfil-i kazâda Sâkine bt. Abdullah mahzarında takrîr-i kelâm edip bundan akdem karye-i mezkûre mahallâtından Turşucu mahallesinde sâkine iken vefât eden Zâhide bt. Abdullah nâm hâtunun muhallefâtına vaz‘-ı yed eyleyip zâhirde vâris-i ma‘rûfu olmamağla emânetim hasebiyle mezbûrenin muhallefâtından üç yüz akçe isâbet edip meblağ-ı mezbûru tehârüc-i şer‘î tarîkle merkūme Sâkine yedinden bi’t-tamâm ahz u kabz eyleyip husûs-ı mezbûra müte‘allik de‘âvî ve husûmât ve mutâlebât ve eymândan mezbûrenin zimmetini ibrâ-i âm ile ibrâ ve ıskāt-ı tâm ile ıskāt eyledim ba‘de’l-yevm husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe li sene seb‘in ve erba‘în ve elf.


Şuhûdü’l-hâl: Şahin Bey b. Abdullah, İbrahim Efendi b. Hüsrev el-İmâm, Ebûbekir Çelebi b. Mehmed, Ahmed Bey b. ( ) Habbâz, Mustafa b. Mehmed ve gayruhüm