|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 160 Hüküm no: 168 Orijinal metin no: [100-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mahmud Bey b. Mirza’nın Ahmed Çelebi b. Muslu’daki alacağını tahsil ettiği
Havâss-ı aliyye kazâsı muzâfâtından Hasköy mahallâtından Pîrî Paşa mahallesinde sâkin Mahmud Bey b. Mirza el-Cündî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ahmed Çelebi b. Muslu nâm kimesne mahzarında ikrâr ve takrîr-i kelâm ve bast-ı merâm edip mezbûr Ahmed Çelebi zimmetinde karz-ı şer‘îden on altı bin akçe hakkım var idi lâkin meblağ-ı mezbûr on altı bin akçeyi mezbûr Ahmed Çelebi yedinden bi’t-tamâm ahz u kabz eyleyip zimmetinde bir akçe ve bir habbe hakkım kalmadı dedikde mukırr-ı merkūmun ikrâr-ı meşrûhunu el-mukarru lehü’l-mezbûr Ahmed Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe sene seb‘in ve erba‘în ve elf.
Şuhûdü’l-hâl: Mehmed Efendi b. Yakub el-Hatîb, Mehmed Çelebi b. Mustafa el-İmâm, Mehmed Bey b. Abdullah el-Cündî, Ali Halîfe b. Mehmed, Süleyman Halîfe b. Halil, Abdi Bey b. Şaban es-Serrâc, Mahmud Çelebi b. Mehmed es-Serrâc, Mehmed Halîfe b. İbrahim el-Müezzin, Ali Beşe [b.] Abdullah
|