|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 160 Hüküm no: 169 Orijinal metin no: [100-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Çelebi b. Muslu’nun babasından intikal eden ve çocukluğunda Mahmud Bey b. Mirza’ya devrettiği vakıf oda ve dükkânlar için emsâl bedel olmadığından fark talebi davasında sulh oldukları
Oldur ki Havâss-ı aliyye kazâsına tâbi‘ Hasköy demekle ma‘rûf karye mahallâtından Kiremitçi Ahmed Çelebi mahallesi sâkinlerinden Ahmed Çelebi b. Muslu nâm kimesne mahfil-i kazâda yine mahalle-i mezbûre sükkânından hâmil-i hâze’l-kitâb Mahmud Bey b. Mirza nâm cündî mahzarında takrîr-i kelâm ve ta‘bîr ani’l-merâm edip karye-i mezbûrede merhûm Pîr Mehmed Paşa İskelesi’nde vâki‘ bir tarafı deryâ ve bir tarafı mezbûr Pîr Mehmed Paşa Vakfı olan debbağhâneler ve bir tarafı tarîk-i âm ve bir tarafı mersûme iskele ile mahdûd ve mümtâz yine merhûm-ı mezbûrun vakfından olup kānûn-ı kadîm üzre babamdan intikāl edip icâre-i mu‘accele ve müeccele ile mutasarrıf olduğum beynimizde ma‘lûmü’l-aded fevkānî ve tahtânî odaların hakk-ı tasarrufunu mukaddemâ vakf-ı merkūmun mütevellîsi izni ile mezkûr Mahmud Bey’e tefvîz ol dahi tefevvuz edip mukābele-i tefvîzde mesfûr Mahmud Bey yedinden fıddî-i Osmânî râyic fi’l-vakt on bir bin akçe alıp kabz eyledim idi, lâkin hîn-i tefvîzde ben hadd-i bülûğda olmamağla müzâyede olundukda rağabât-ı nâs bi’l-külliye munkatı‘a olmadığını bilmediğimden meblağ-ı mezbûr mahdûd-ı mezkûrun bedel-i misli olmayıp bana gadr olmuşdur, hâlen mahdûd-ı mezbûrun yevm-i tefvîzdeki bedel-i mislini taleb eylediğimden sonra mahalle-i mezbûrede lede’l-ahâlî ve’l-cîrân ma‘lûmü’l-hudûd olan mülk menzilimde mezbûr Mahmud Bey ile ma‘an sâkin olmağın ücretinden ecr-i mislini dahi taleb edip suâl olundukda merkūm Mahmud Bey müdde‘â-yı mezbûru inkâr ile cevâb verip beynimizde münâza‘ât-ı kesîr[e] vâkı‘a oldukda muslihûn tavassut edip mâbeynimizi on bir bin nakd-i râyic fi’l-vakt akçe ve beynimizde ma‘lûmü’l-kıymet bir mutallâ tülbent üzerine inkârdan sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr on bir bin [101] akçeyi ve tülbent-i mersûmu bi’t-tamâm alıp kabz edip min ba‘d husûs-ı mezbûra müte‘allik da‘vâ ve husûmât ve eymân ve muhâsamâ[t]dan mezbûr Mahmud Bey’in zimmetini bi’l-külliye ibrâ-i âmm-ı kātı‘ü’n-nizâ‘la ibrâ ve ıskāt eyledim deyû bi’t-tav‘ ve’r-rızâ ikrâr ve i‘tirâf ettiğinde el-mukarru lehü’l-mezbûr dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe li sene seb‘in ve erba‘în ve elf.
Şuhûdü’l-hâl: Mehmed Çelebi b. Mustafa el-İmâm, Mahmud Bey b. Abdullah el-Cündî, Ali Halîfe b. Mehmed, Süleyman Halîfe b. Halil, Mehmed Efendi b. Yakub el-Hatîb es-Serrâc, Mahmud Çelebi b. Mehmed es-Serrâc, Mehmed Halîfe b. İbrahim el-Müezzin, Ali Beşe b. Abdullah ve gayruhüm
|