.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 162
Hüküm no: 171
Orijinal metin no: [101-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yusuf Beşe’nin Güni köyünde bulunan emlâk hisselerini Muharrem Efendi’ye sattığı ve tarlalarının tasarruf hakkını devrettiği

Vilâyet-i Anadolu’da Ulak? kazâsına tâbi‘ Güni nâm karye sükkânından olup Müsâfirlerli? demekle ma‘rûf Yusuf Beşe b. İltutar nâm râcil mahfil-i kazâda işbu râfi‘ü’l-kitâb fahrü’l-a‘yân Muharrem Efendi b. ( ) mahzarında ikrâr ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd olup karındaşım Osman nâm kimesne ile ale’l-iştirâki’s-seviy mutasarrıf olduğumuz bir bâb fevkānî ve bir bâb tahtânî beytden nısf hisse-i şâyi‘amı ve yine lede’l-ahâlî ma‘lûmü’l-hudûd olup bir kıt‘a harâba müşrif mülk mutasarrıf olduğumuz nısf hisse-i şâyi‘amı ve yine lede’l-ahâlî ve’l-cîrân ma‘lûmü’l-hudûd olup harâba müşrif mutasarrıf olduğumuz samanlık ve harman yerinden nısf hisse-i şâyi‘amı safka-i vâhide ile mûmâ-ileyh Muharrem Efendi hazretlerine nakd-i râyic fi’l-vakt altı yüz akçeye bey‘-i bâtt-ı sahîh-i şer‘î ile bey‘ edip anlar dahi iştirâ ve kabûl ettiklerinden sonra, yine karye-i mezbûrede mevâzi‘-i müte‘addidede vâki‘ inde’l-ahâlî ve’l-cîrân ma‘lûmü’l-hudûd olup tefvîz-i âtî sudûruna değin mutasarrıf olduğumuz tahmînen iki müd tohum isti‘âb eder tarlaların nısf hisse-i şâyi‘asından hakk-ı tasarrufunu sâhib-i arz ma‘rifetiyle mûmâ-ileyh Efendi hazretlerine tefvîz edip anlar dahi tefevvuz ve kabûl ettiklerinden sonra mukābele-i tefvîzde yed-i şerîflerinden [102] beş yüz akçe semen-i mezbûr ile cem‘an bin yüz akçeyi bi’t-tamâm olup kabz edip mebî‘ât-ı merkūme ve arâzi-i mezbûreyi mahallinde kabza ve tasarrufa mûmâ-ileyh Efendi hazretlerini taslît eyledim dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe li sene seb‘in ve erba‘în ve elf.


Şuhûdü’l-hâl: Receb Efendi b. İdris el-kadı sâbıkan, İbrahim Efendi b. ( ) el-kadı sâbıkan, Yahya Efendi b. İslâm, Yahya Çelebi b. Receb el-müsta‘id, İsmail Bey b. Receb bevvâb-ı sultânî, İbrahim Bey b. Receb, Mehmed b. Süleyman, Emrullah b. Mustafa, Kasım b. Abdullah ve gayruhüm