|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 163 Hüküm no: 173 Orijinal metin no: [102-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Asuzader v. Papas’ın Eğin’deki bağını Avasıb v. Murad’a sattığı
Vilâyet-i Anadolu’da vâki‘ Arapgir sancağına tâbi‘ Eğin nâm kasaba sükkânından Asuzader v. Papas nâm Ermeni meclis-i şer‘-i hatîr-i lâzımü’t-tevkīr[de] işbu râfi‘-i hâze’s-sifr Avasıb v. Murad nâm Ermeni mahzarında bi’t-tav‘i’s-sâf ikrâr ve takrîr-i kelâm edip kasaba-i mezbûrede vâki‘ bir tarafı müşterî-i mezbûr mülkü ve bir tarafı Serkis v. Hosdik? mülkü ve bir tarafı Murad v. Avasıb mülkü ve bir tarafı tarîk-i âm ile mahdûd ve mümtâz olan bir kıt‘a mülk bağımı merkūm Avasıb’a yirmi beş riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûdu mahallinde mezbûr Avasıb’a kabza ve tasarrufa taslît eyledim, ba‘de’l-yevm zikr olunan bir kıt‘a bağ mezbûr Avasıb?’ın mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Zilhicceti’ş-şerîfe li sene seb‘in ve erba‘în ve elf.
Şuhûdü’l-hâl: [103] Sefer Beşe b. Abdullah er-Râcil, Mustafa Beşe b. Abdullah er-Râcil, Hasan b. Maksud, Süleyman b. Ali, Ali b. Yeki? Bey, Mehmed Beşe sucu?, Bayik? v. Ferhad, Derviş v. Toros?, Agop v. Bahâdır, Haim v. Manik, Cantik? v. Mercan
|