.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 164
Hüküm no: 174
Orijinal metin no: [103-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mumcu esnâfından Dimo v. Mâh’ın Âişe Sultan Vakfı’na ait mumhânedeki hisselerini İsteryo v. İstafi’ye devrettiği

Havâss-ı aliyye kazâsına tâbi‘ Hasköy mahallâtından Sütlüce mahallesinde sâkin mumcu tâ’ifesinden Dimo v. Mah? nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb İsteryo v. İstafi nâm zimmî muvâcehesinde ikrâr ve takrîr-i kelâm edip mahrûse-i İstanbul’da vâki‘ merhûme Âişe Sultan -tâbet serâhâ- evkāfından olup mahalle-i mezbûrede der[yâ] kenarında? vâki‘ bir tarafı Mehmed Paşa bahçesi ve bir tarafı yine vakf-ı mezbûr ve bir tarafı deryâ ve taraf-ı âharı tarîk-i âm ile mahdûd olup tûlen yirmi zirâ‘ ve arzan sekiz bi-hesâb-ı satrancî bennâ zirâ‘ıyla yüz altmış zirâ‘ arsa üzerinde mebnî iki kepengi müştemil olup icâre-i mu‘accele ve yevmî dört akçe müeccele ile mutasarrıf olduğum bir bâb mumhâne dükkânının rub‘ hisse-i şâyi‘asından hakk-ı tasarrufunu vakf-ı mezbûrun mütevellîsi izniyle merkūm İsteryo’ya tefvîz eyledim ol dahi vech-i mübeyyen üzre tefevvuz ve kabûl eyleyip mukābele-i tefvîzde merkūm İsteryo yedinden nakd-i râyic fi’l-vakt on bin akçe alıp ve mârrü’z-zikr mumhâne içinde olup silk-i mülkümde münselik olan otuz aded fıçının ve bir kebîr kazanın ve dört aded bakır kepçenin ve üç aded tencerenin ve bir tezgâh ta‘bîr olunur alâtın ve mumhâneye müte‘allik olan sâir alâtın rub‘ hisse-i şâyi‘alarını safka-i vâhide ile merkūm İsteryo’ya iki bin beş yüz akçeye bey‘-i bâtt-ı sahîh-i şer‘î ile bey‘ edip cem‘an on iki bin beş yüz akçeyi merkūm İsteryo yedinden bi’t-tamâm ahz u kabz eyledim dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Zilhicceti’ş-şerîfe li sene seb‘in ve erba‘în ve elf.


Şuhûdü’l-hâl: Fahrü’l-akrân Ali b. Abdülmennân el-bevvâbü’s-sultânî, Hüseyin Çelebi b. Ömer el-Müezzin, Abdülhalim Çelebi b. Mehmed el-Müderris, Mustafa Efendi el-mu‘îd, Ahmed b. Hasan, Mehmed Beşe b. Abdülmennân, Mahmud Çelebi b. Mehmed serrâc-ı hâssa, el-Hâc Mehmed b. Abdullah, Yusuf Beşe b. Abdullah er-Râcil, Ahmed b. Abdullah, Mustafa Bey kethüdâ[-i] mumcular, Zipro? v. Opro?, Apostol v. Opro?, Baroş? v. Harto, Apostol v. Ergir?, Yorgi v. Ziz?, Alekeş? v. ( )