.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 164
Hüküm no: 175
Orijinal metin no: [103-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Borçlu olarak ölen Hasan’ın Turşucu Vakfı’na olan borcunun ödenmesi için evinin müzâyede ile Pürkadem b. Himmet’e satıldığı

Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin iken bundan akdem fevt olan Hasan b. ( ) nâm kimesnenin verâseti kebîr oğlu Mustafa’ya ve kebîre kızı Alime’ye ve sagīr oğlu Mehmed’e ve zevce-i metrûkesi Rahime bt. Abdullah nâm hâtuna münhasıra olduğu şer‘an mütehakkik oldukdan sonra mezbûrân Mustafa ve Âlime asâleten ve mezbûre Rahime kendi tarafından asâleten ve sagīr-i mezbûrun tesviye-i umûruna vasîyy-i şer‘îsi olmağla vesâyeten mahfil-i kazâda Pürkadem b. Himmet nâm kimesne mahzarında her biri asâleten ve vesâyeten ikrâr ve takrîr-i kelâm edip merhûm-ı mezbûr medyûnen vefât edip nukūd ve menkūlünden mahalle-i mezbûrede vâki‘ bir tarafı İlyas b. Mehmed mülkü ve bir tarafı Abdülbâkī mülkü ve bir tarafı Latef v. ( ) mülkü ve bir tarafı tarîk-i hâs ile mahdûd ve mümtâz olup iki bâb fevkānî odayı ve bir bâb ahırı ve bi’r-i mâ’ı ve havluyu müştemil olan mülk menzillerinden gayrı deynine vefâ eder mâlı olmayıp karye-i mezbûrede merhûm Turşucu Vakfı’na olan üç [104] bin akçe deyn için menzil-i mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildikden sonra menzil-i mezbûr sûk-ı sultânîde kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra mezbûr [Pürkadem b.] Himmet üzerinde on iki bin nakd-i râyic fi’l-vakt akçede karâr edip ve ziyâde ile tâlib-i âhar zuhûr etmemeğin menzil-i mezbûru asâleten ve vesâyeten merkūm Himmet’e zarûret-i deyn-i merkūm için mersûmü’l-mikdâr on iki bin akçeye bey‘-i kat‘î ile bey‘ eyleyip ol dahi vech-i mübeyyen üzre iştirâ eyledikden sonra kabz-ı semen-i ma‘dûd ve teslîm-i mebî‘-i mahdûd eyledik dediklerinde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâsıtı Zilhicceti’ş-şerîfe li sene seb‘in ve erba‘în ve elf.


Şuhûdü’l-hâl: Ahmed Efendi b. Abdi el-İmâm, Mahmud Çelebi b. Mehmed es-Serrâc, Ali Beşe b. Ahmed er-Râcil, Veli b. Hasan, Mehmed b. Mustafa, Mehmed b. Bilal, Pîrî b. Rıdvan, İlyas b. Mehmed, Hasan b. Pîrî, Mehmed Bey el-Cündî, Ali b. Abdullah ve gayruhüm